Mannréttindi
Mannréttindi, lýðræði og réttarríkið eru grunngildi Evrópusambandsins.
ESB leitast við að tryggja að öll mannréttindi séu virt alls staðar – jafnt borgaraleg, sem pólitísk, efnahagsleg, félagsleg og menningarleg. Þetta er staðfest í Mannréttindayfirlýsingu Sameinuðu þjóðanna og var áréttað á Heimsráðstefnu um mannréttindi árið 1993. ESB leggur líka áherslu á réttindi kvenna, barna, minnihlutahópa og flóttafólks.
Í Lissabon-sáttmálanum, sem myndar lagalegan og stofnanalegan grunn ESB, er skýrt kveðið á um að sambandinu sé stjórnað í samræmi við eftirfarandi grunnreglur: Lýðræði, réttarríki, mannréttindi og frelsi, virðing fyrir mannlegri reisn, grunnreglur um jöfnuð og samstöðu og virðing fyrir grunnreglum sáttmála Sameinuðu þjóðanna og alþjóðlegum lögum. Þessar grunnreglur eru ítrekaðar í sáttmála Evrópusambandsins um grundvallarréttindi þar sem þessi réttindi eru dregin saman í einum texta.
Þó svo ESB hafi náð góðum árangri á sviði mannréttinda er ekki látið þar við sitja. Sambandið berst gegn kynþáttahyggju, útlendingahatri og öðrum tegundum mismununar sem byggð er á trú, kyni, aldri, fötlun og kynhneigð. ESB leggur einnig sérstaka áherslu á réttindi flóttamanna og innflytjenda.
Sambandið hefur gert mannréttindi og lýðræði 
að hornsteinum utanríkisstefnu sinnar . Margs konar aðgerðir og áætlanir vinna að slíkum markmiðum, þ. á m.:
- Samræður um mannréttindi við fleiri en 30 lönd.
- Átta leiðarvísar um mannréttindamál þar sem forgangsmál ESB koma fram.
- Reglulegar opinberar yfirlýsingar.
- Verkefni og vettvangsaðgerðir.
- Þróunarstefna og aðstoð.
- Þátttaka í fjölþjóðlegu samstarfi, sérstaklega innan S.þ.
Stuðningur við mannréttindi og lýðræði er alltaf hafður í huga við mótun og framkvæmd stefnu. Til að mynda innihalda allir viðskipta- og samstarfssamningar ESB ákvæði um að mannréttindi séu lykilatriði í samskiptum aðila.
Styrktarsjóður upp á um 1,1 milljarð evra er aðgengilegur í gegnum European Instrument for Democracy and Human Rights ( EIDHR ) fyrir árin 2007-2013 til að hjálpa frjálsum félagasamtökum, jafnt staðbundnum sem alþjóðlegum, til að efla mannréttindi um allan heim.