Komisioneri i BE-së për Zgjerim dhe Politikë të Fqinjësisë, Štefan Füle vizitoi Kosovën më 19 mars, si pjesë e vizitës së tij në Ballkanin Perëndimor duke përfshirë Shqipërinë, Bosnje dhe Hercegovinën, Malin e Zi dhe Serbinë. Gjatë qëndrimit në Kosovë, Komisioneri Füle u takua me faktorët kyç vendës dhe ndërkombëtarë, duke përfshirë Presidentin Fatmir Sejdiu, kryeministrin Hashim Thaçi, ministrat dhe kryetarët e komunave, si dhe Përfaqësuesin Special të BE-së, Pieter Feith dhe kreun e misionit të EULEX-it, Yves de Kermabon.

Më herët në shkurt, Catherine Ashton, Përfaqësuesja e Lartë e Unionit për Punë të Jashtme dhe Politikë të Sigurisë dhe zëvendës Presidenti e Komisionit Evropian (HR/VP) vizituan Kosovën si pjesë e vizitës së saj në Ballkanin Perëndimor. Ajo po ashtu u takua me përfaqësuesit e BE-së në Kosovë dhe me autoritetet kosovare.

Komisioni Evropian propozon përtrirjen e preferencave tregtare autonome për Ballkanin Perëndimor

Komisioni Evropian në shkurt u pajtua të vazhdojë preferencat tregtare autonome të veçanta që Bashkimi Evropian ua ofron vendeve të Ballkanit Perëndimor deri më 2015. Vazhdimi do të mundësojë që ekonomitë e Ballkanit Perëndimor të përfitojnë nga një qasje e pakufizuar pa taksa doganore në tregun e BE-së për gati të gjitha produktet me origjinë nga këto vende apo territore.

Kampet e kontaminuara të romëve do të mbyllen me ndihmën e BE-së

Në një përpjekje për të mbyllur kampet e kontaminuara me plumb të Cesmin Lugut dhe Osterodes të cilat kanë sjellë pasoja shëndetësore të një numri të konsiderueshëm të fëmijëve dhe të rriturëve romë, ashkalij dhe egjiptas, Zyra ndërlidhëse e KE-së, në partneritet me Qeverinë e Kosovës dhe Komunën e Mitrovicës në fund të shkurtit filloi fazën realizuese të projektit €5 milionësh për të përkrahur familjet rome, ashkalije dhe egjiptase në kampet e Mitrovicës Veriore.

Hapen tri shkolla me fonde të BE-së në komunën e Shtërpcës dhe të Zveçanit

Janë përuruar tri shkolla fillore në shkurt dhe mars 2010 nga Komisioni Evropian, dy në komunën e Shtërpcës dhe një në Zveçan. BE-ja ka investuar më shumë se € 760.000 për të rinovuar, zgjeruar apo për të ndërtuar tërësisht këto shkolla.

Tri komuna të reja i bashkohen procesit të Zhvillimit Ekonomik Rajonal të BE-së

Kryetari i komunës së Graçanicës nënshkroi më 22 shkurt marrëveshjen ndërkomunale për t’iu bashkuar procesit të Zhvillimit Ekonomik Rajonal të BE-së, duke u bërë anëtare e Agjencisë për Zhvillim Rajonal (AZhR) me qendër në Prishtinë. Më herët më 9 shkurt, kryetari i Kllokotit dhe Ranillugut po ashtu e nënshkruan marrëveshjen duke iu bashkuar Zhvillimit Ekonomik Rajonal të BE-së në pjesën lindore të Kosovës. Ato po ashtu u bënë anëtare me të drejta vote të Bordit Udhëheqës të AZhR-së, lindje.

Kosova përkrahet për të marrë pjesë në Zonën e Përbashkët të Aviacionit Evropian

Zyra ndërlidhëse e Komisionit Evropian filloi përkrahjen e saj për Autoritetin e Aviacionit Civil të Kosovës për të realizuar marrëveshjen për Zonën e Përbashkët të Aviacionit Evropian (ECAA). Projekti dyvjeçar prej € 1 milion përkrah zhvillimin e transportit të aviacionit civil në Kosovë duke përmbushur standardet evropiane në sigurinë e aviacionit, zhvillimin e kornizës së tregut duke u bazuar në parimet e qasjes së lirë dhe konkurrencës së drejtë.

Përfundohen dy projekte të financuara nga BE-ja për të përkrahur minierën e Stantërgut

Punimet për ta bërë minierën e Stantërgut të sigurt u përfunduan në shkurt përmes financimit € 1.6 milionë nga BE-ja. Miniera që i përket kompleksit të minierave të Trepçës, u vlerësua se kishte nevojë të jashtëzakonshme për intervenime që të kishte kushtet për punë për prodhim normal dhe ambient të sigurt pune.

Ofrimi i pajisjeve dhe punët ndërtuese të kryera në minierë mundësuan stabilizimin e brendësisë së minierës duke mbushur zbrazëtirat, të shkaktuara nga eksploatimi i vazhdueshëm i xeheve. 

Vazhdon shqyrtimi i progresit në agjendën evropiane

Nga janari deri në mars të vitit 2010 janë mbajtur tri mbledhje sektoriale si pjesë e dialogut të rregullt me qeverinë e Kosovës në kuadër të Procesit të Stabilizim-Asociimit. Luftimi i kurrupsionit dhe krimit të organizuar, sforcimi i menaxhimit të integruar të kufijve dhe ndërmarrja e veprimeve për të përmirësuar kornizën e regjistrimit civil ishin disa prej temave që u shqyrtuan në mbledhjen e janarit. Në fillim të marsit, Komisioni dhe Qeveria shqyrtuan fushat e novacionit, kapitalit njerëzor, politikat sociale dhe shoqërinë e informatës. Më vonë gjatë marsit, KE-ja dhe Komisioni Evropian u takuan për të diskutuar progresin në fushën e bujqësisë, peshkatarisë, pylltarisë dhe sigurisë së ushqimit.

Gara e fotografisë në Evropën Juglindore hyn në fazën finale

Donika Rudi, muzikante dhe fotografe nga Kosova, është njëra prej 24 finalistëve të garës së fotografisë “Evropa Juglindore: Njerëzit dhe Kultura”, e cila u mbyll zyrtarisht më 20 janar 2010. Tani vizituesit mund të votojnë për fotografinë më të mirë në mesin e 24 fotografive garuese në faqen e internetit. Cila iu pëlqen më së tepërmi? Shprehni mendimin e juaj dhe votoni për fotografinë që mendoni se meriton të fitojë Shpërblimin e së përzgjedhurës nga publiku. Votimi publik përfundon më 26 mars.

Ky email është dërguar në emër të Zyrës ndërlidhëse të Komisionit Evropian në Kosovë.
Për ta ndryshuar abonimin tuaj, duke përfshirë abonimet në gjuhë tjera,
vizitoni faqen tonë të internetit.
Nëse dëshironi të ç'regjistroheni nga buletini, klikoni këtu.