Zyra ndërlidhëse e KE-së në Prishtinë ofroi një varg të ngjarjeve edukuese dhe argëtuese njëjavore për ta festuar Ditën e Evropës 2010 në Kosovë. Programi filloi me Fotoekspozitën e Trashëgimisë Kulturore në hamamin e Prizrenit, i pasuar nga debati për Traktatin e Lisbonës, hapja e fushatës për efikasitetin e energjisë, ahengu i studentëve "E dua Evropën", përurimi i ndërtesës së Ministrisë së Punëve të Brendshme, hapja e pikës informative të BE-së në Mitrovicën veriore, turne çiklizmi në Gjakovë dhe panair rruge i BE-së i mbajtur më 9 maj.

Komisioneri Fuele viziton Kosovën për herë të dytë

Komisioneri i BE-së për Zgjerim dhe Politikë të Fqinjësisë, Stefan Fuele, vizitoi Kosovën zyrtarisht për herë të dytë, më 6 dhe 7 maj 2010. Ai u takua me partnerët kyçë vendës e ndërkombëtarë dhe përuroi ndërtesën e re të Ministrisë së Punëve të Brendshme në Prishtinë e financuar nga BE-ja, pikën informative të BE-së në Mitrovicën veriore dhe kompleksin afarist (parkun e biznesit) në Zveçan. Ai po ashtu mbajti një ligjëratë para studentëve të universitetit në Mitrovicën Veriore, dhe shënoi Ditën e Evropës në një pritje formale në Prishtinë.

Shoqëria civile inkurajohet të aplikoj për grante që promovojnë demokracinë dhe të drejtat e njeriut

Të gjitha organizatat e shoqërisë civile në Kosovë inkurajohen që të aplikojnë me idetë e tyre për projekte për grantin e Instrumentit Evropian për Demokraci dhe të Drejtat e Njeriut (EIDHR). Afati i fundit është 31 maj 2010. Objektivi i përgjithshëm i EIDHR-së për Kosovën është konsolidimi i rolit të shoqërisë civile në promovimin e të drejtave të njeriut dhe reforma demokratike, përkrahja për parandalimin e konflikteve dhe konsolidimi i pjesëmarrjes dhe përfaqësimit politik. Për më shumë informata lidhur me grantin, vizitoni seksionin tonë për tenderë.

Gazetarët ftohen të flasin për energji

Në fund të prillit, Zyra ndërlidhëse e KE-së hapi garën për gazetarë për raportimin më të mirë mediatik mbi efikasitetin e energjisë dhe burimeve të energjisë së përtëritshme.
Gara është e hapur për të gjithë gazetarët nga Kosova të cilët inkurajohen që t'i përcjellin iniciativat dhe praktikat më të mira që po bëhen në publik, ndërtesa të mëdha dhe shtëpi private. Gara është pjesë e një fushate më të gjerë për vetëdijësimin e publikut dhe përkrahjes së financuar nga BE-ja për Ministrinë e Energjisë dhe Minierave. Afati i fundit për dorëzimin e materialeve është 24 nëntor 2010.

KE përkrah iniciativën lokale të mbjelljes së drunjëve për Ditën e Tokës

Me rastin e Ditës së Tokës, në shkollën fillore "Pandeli Sotiri" në Obiliq u mbajt një ceremoni për ta shënuar përfundimin e iniciativës pranverore për mbjelljen e drunjve nga Drunjtë e Paqes në Kosovë, e organizuar nga OJQ InterSilva dhe e përkrahur nga Zyra ndërlidhëse e Komisionit Evropian dhe Komuna e Obiliqit.

Rreth 200 drunj u mbollën përgjatë rrugës kryesore të Obiliqit në prill si pjesë e kësaj iniciative, me përkrahjen financiare të Zyrës ndërlidhëse të KE-së. Më herët në mars, fermerët nga Obiliqi vijuan seminare për mbjelljen dhe mirëmbajtjen e drunjëve, gjatë të cilave u mbollën 1,400 pemë në toka bujqësore. Vullnetarë të shkollave të mesme dhe mësues po ashtu vijuan trajnime të ngjashme.

BE-ja ka finalizuar studimin e fizibilitetit për Pallatin e Drejtësisë

Më 19 prill, Zyra ndërlidhëse e Komisionit Evropian prezantoi planet për ndërtesën e re të drejtësisë e njohur si Pallati i Drejtësisë. Kompleksi do të ndërtohet në zonën e Prishtinës së re. Realizimi i projektit të Pallatit të Drejtësisë do të sigurojë hapësirë të duhur për sistemin e drejtësisë dhe do të përmirësojë shërbimet. Po ashtu do të përkrah qasjen dhe besimin e publikun në sektorin e drejtësisë duke e përmirësuar efikasitetin e saj, duke e ulur ngarkesën me raste dhe duke e shtuar pavarësinë, besimin dhe praninë e sistemit të drejtësisë.

Kosova do të kursente para me mbylljen e hershme të Kosovës A

Në fund të marsit, Zyra ndërlidhëse e KE-së prezantoi rezultatet e raportit për mbylljen e termocentralit të vjetër Kosova A. Konkluzionet e studimit vërtetojnë se kostoja e mbylljes së Kosovës A herët është në çdo mënyrë më e lirë se sa mbajtja e tij hapur deri në vitin 2017.

Termocentrali Kosova A është burim i ndotjes së konsiderueshme dhe me rrezik për shëndetin për Kosovën në përgjithësi dhe për komunat e afërta në veçanti. Termocentrali liron 100,000 tonë të pluhurit në vit dhe në bazë të disa studimeve, kjo sasi është deri në 180 herë më e lartë se sa që duhet të jetë, kur merren parasysh limitet e BE-së.

Ky email është dërguar në emër të Zyrës ndërlidhëse të Komisionit Evropian në Kosovë.
Për ta ndryshuar abonimin tuaj, duke përfshirë abonimet në gjuhë tjera,
vizitoni faqen tonë të internetit.
Nëse dëshironi të ç'regjistroheni nga buletini, klikoni këtu.