Prezenca e BE-së në Kosovë është bashkuar pas shkrirjes së Zyrës ndërlidhëse të Komisionit Evropian me Zyrën e Përfaqësuesit Special të BE-së. Z. Samuel Zhbogar, ish Ministër i punëve të jashtme të Sllovenisë, mori mandatin si Shef i Zyrës së Bashkimit Evropian në Kosovë dhe Përfaqësues Special i Bashkimit Evropian në shkurt të vitit 2012.

Në paraqitjet e tij të para publike, z. Zhbogar theksoi se emërimi i tij vjen në një moment të rëndësishëm për marrëdhëniet në mes të Kosovës dhe BE-së. Prioritetet kryesore për BE-në në Kosovë për vitin 2012 përfshijnë përgatitjen e studimit të fizibilitetit, lirinë e lëvizjes në veri të Kosovës, dialogun për viza dhe lehtësimin e dialogut në mes të Prishtinës dhe Beogradit. Në muajin e parë pas marrjes së detyrës, Shefi i Zyrës së Bashkimit Evropian në Kosovë/Përfaqësuesi Special i BE-së, takoi udhëheqësit politik, përfaqësuesit e shoqërisë civile, komunitetet pakicë, gratë udhëheqëse dhe mediat.

Shefi i Zyrës së BE-së/PSBE takon shoqërinë civile

Shef i Zyrës së BE-së/PSBE Samuel Zhbogar mbajti në Prishtinë takimin e parë njoftues me 25 organizata të shoqërisë civile nga Kosova. Z. Zhbogar mbajti një fjalim hyrës ku theksoi përfitimet e integrimeve evropiane për Kosovën. Valdete Idrizi, Drejtoreshë Ekzekutive e platformës CIVIKOS, në prezantimin e saj theksoi nevojën që shoqëria civile të ketë komunikim të strukturuar me institucionet e Kosovës me qëllim që të kenë ndikim në legjislacion dhe në politikat e qeverisë. Zyra e BE-së do të vazhdojë të angazhohet në dialog të rregullt me organizatat e shoqërisë civile të Kosovës.

Shënimi i Ditës Ndërkombëtare të Gruas

Me rastin e Ditës Ndërkombëtare të Gruas më 8 mars, Shefi i Zyrës së BE-së/PSBE dhe Shefi i misionit të EULEX-it organizuan një pritje të përbashkët në Prishtinë. Të ftuara ishin gratë nga shoqëria kosovare, përfshirë gratë afariste, përfaqësueset e shoqërisë civile, politikanet dhe deputetet e parlamentit, si dhe gratë që punojnë për misionet e Bashkimit Evropian. Përfaqësuesja e lartë e BE-së, Catherine Ashton, lëshoi një deklaratë për ditën ndërkombëtare të gruas, që thoshte: "Përderisa mund të krenohemi me përparimin e dukshëm të arritur, kjo ditë na përkujton për punët e shumta që na presin për të arritur barazinë e mirëfilltë gjinore. Në këtë ditë të veçantë, BE-ja riafirmon zotimin e saj për promovimin e barazisë gjinore dhe avancimin e gruas anekënd botës".

Zyra e BE-së prezanton planin për ringjalljen e Brezovicës

Zyra e BE-së prezantoi masterplanin për ringjalljen e qendrës turistike në Brezovicë, në komunën e Shtërpcës. Plani parasheh zhvillimin e një qendre turistike të pajisur plotësisht, në afërsi të qendrës ekzistuese të skijimit.
Qendra e re, që do të funksionojë gjatë gjithë vitit, parashihet që të ndërtohet me kapacitet për pritje të mbi 10,000 mysafirëve.

Ringjallja e pushimores së popullarizuar pritet që të krijojë mbi 3,000 vende të punës. Gjatë vitit 2012 pritet të mbahet një konferencë ndërkombëtare me investitorë.

Programi 'Kosova e bukur' shpall thirrjen e re për propozime

Zyra e BE-së ka lansuar thirrjen e dytë për propozime për programin e BE-së 'Kosova e bukur'. Shefi i Zyrës së BE-së/PSBE, Samuel Zhbogar, inkurajoi të gjithë kryetarët e komunave të Kosovës që të parashtrojnë kërkesat me propozimet e tyre për projekt.

Synimi i 'Kosovës së bukur', nga BE-ja, është identifikimi i projekteve të vogla dhe të mesme nëpër komuna që do të synonin krijimin e vendeve të punës, në veçanti për të rinjtë dhe grupet e margjinalizuara, dhe do të rezultonin në përmirësim të infrastrukturës urbane.

Fituesit e Kuizit Evropa 2012

Fitues të Kuizit Evropa 2012 janë nxënësit e shkollës 'Thimi Mitko' nga Gjilani, të cilët do të kenë mundësi të udhëtojnë për në Bruksel. Kuizi Evropa u organizua nga projekti i financuar nga BE-ja, i quajtur Perspektiva e BE-së në Kosovë. Pyetjet u përgatitën nga tekstet mësimore 'Let’s Head to Europe!', i shkruar për të nxitur kureshtjen e nxënësve dhe për të përmirësuar dijen e tyre rreth shteteve të BE-së dhe rreth politikave të saj.

Ky email është dërguar në emër të Zyrës së Bashkimit Evropian në Kosovë / Përfaqësuesit Special të Bashkimit Evropian në Kosovë.
Për ta ndryshuar abonimin tuaj, duke përfshirë abonimet në gjuhë tjera,
vizitoni faqen tonë të internetit.
Nëse dëshironi të ç'regjistroheni nga buletini, klikoni këtu.