Եվրահանձնաժողովը ներկայացրեց Հայաստանի հետ վիզաների ազատականացման գործողությունների ծրագիրը
Այսօր Երևանում Եվրոպական հանձնաժողովը Հայաստանի կառավարությանը ներկայացրեց վիզաների ազատականացման գործողությունների ծրագիրը։
Հայաստան–ԵՄ հարաբերություններում ձևավորված դրական դինամիկայի և գործընկերության խորացման պայմաններում Գործողությունների ծրագրի պաշտոնական մեկնարկը կարևոր հանգրվան է ԵՄ-ի և Հայաստանի միջև վիզաների լիարժեք ազատականացման գործընթացում: Գործողությունների ծրագիրը սահմանում է այն տեխնիկական և քաղաքական պահանջները, որոնք Հայաստանը պետք է իրականցնի՝ մինչև իր քաղաքացիների համար առանց վիզայի մուտքի ռեժիմի ներդրումը:
Ներքին գործերի և միգրացիայի հարցերով եվրոպական հանձնակատար Մագնուս Բրյունները նշել է.
«Գործողությունների ծրագիրն ավելին է, քան պարզապես ազատ ճամփորդելու հնարավորություն։ Հայաստանի իրականացրած բարեփոխումները նպաստում են նաև Եվրոպական միության անվտանգության ամրապնդմանը՝ մեր ընդհանուր սահմաններից անդին։ Շարժունակության կարգավորված և հստակորեն կառավարելի պայմաններում ճամփորդելը դառնում է ավելի պարզ, ինչն օգնում անօրինական միգրացիայի կանխարգելմանը»։
Ծրագիրը խթանելու է բարեփոխումներ Հայաստանում՝ մի շարք առանցքային ոլորտների, մասնավորապես՝ անձնագրերի և ճամփորդական փաստաթղթերի անվտանգության, սահմանային և միգրացիոն կառավարման, հասարակական կարգի, արտաքին հարաբերությունների և հիմնարար իրավունքների ուղղությամբ: Եվրոպական հանձնաժողովը պարբերաբար կգնահատի Հայաստանի առաջընթացը՝ վերահսկելու գործողությունների ծրագրով նախատեսված հենանիշների հետևողական և արդյունավետ իրականացումը, այդ թվում՝ պարբերական հաշվետվությունների միջոցով:
Հայաստանի և ԵՄ-ի միջև վիզաների ազատականացման երկխոսությունը մեկնարկել է 2024 թ. սեպտեմբերին։ Այսօրվա փաստաթուղթը մշակում է այն բարեփոխումների և հենանիշների շրջանակը, որոնք պետք է ուղղորդեն Հայաստանի առաջընթացը՝ առանց վիզայի ռեժիմի պայմաններին համապատասխանելու ճանապարհին։ Գործողությունների ծրագրում ներառված բոլոր հենանիշների ամբողջական և արդյունավետ իրականացումից հետո վիզաների ազատականացման երկխոսությունը կհամարվի հաջողությամբ ավարտված: Սա զգալիորեն կհեշտացնի և կնվազեցնի ԵՄ կարճաժամկետ այցելությունների (յուրաքանչյուր 180-օրյա ժամանակահատվածում մինչև 90 օր) ծախսերն ու ընթացակարգերը Հայաստանի քաղաքացիների համար։ Հիշեցնենք, որ 2014 թ. հունվարի 1-ից ՀՀ քաղաքացիները արդեն օգտվում են ԵՄ-ի հետ վիզաների դյուրացման համաձայնագրից:
ԿՈՆՏԱԿՏԱՅԻՆ ՏՎՅԱԼՆԵՐ
Markus Lammert – Tel.: +32 2 296 75 33;
Cristina Dumitrescu - Tel.: + 32 2 2966 60 90 91