Напярэдадні Міжнароднага дня барацьбы за ліквідацыю гвалту ў адносінах да жанчын, які адзначаецца 25 лістапада, Еўрапейская камісія і Высокі прадстаўнік/Намеснік старшыні Еўрапейскай камісіі Жазэп Барэль выступілі з наступнай заявай:

«Гвалт у адносінах да жанчын мае месца ў кожнай краіне. Факты шакуюць – у ЕС і ва ўсім свеце кожная трэцяя жанчына падвяргалася фізічнаму альбо сэксуальнаму гвалту. Кожная пятая дзяўчынка сёння з'яўляецца ахвярай сэксуальнага гвалту. Гвалт у інтэрнэце распаўсюджваецца: кожная другая маладая жанчына падвяргаецца кібергвалту па гендарнай прыкмеце.

ЕС асуджае ўсе формы гвалту ў адносінах да жанчын і дзяўчынак. У 21 стагоддзі недапушчальна, каб жанчыны і дзяўчынкі працягвалі падвяргацца жорсткаму абыходжанню, пераследу, згвалтаванням, калецтвам альбо прымусу да ўступлення ў шлюб.

У сакавіку гэтага года Еўрапейская місія прапанавала новыя правілы ЕС па барацьбе з гвалтам у адносінах да жанчын, у тым ліку ў інтэрнэце. Сёння Камісія таксама аб'яўляе аб увядзенні агульнага нумара гарачай лініі ЕС для ахвяр гвалту ў дачыненні да жанчын – 116 016.

У гэтым годзе мы надаем асаблівую ўвагу гвалту ў дачыненні да жанчын у зонах канфліктаў. Ва Украіне расійскія ўзброеныя сілы здзяйсняюць акты сэксуальнага гвалту, а мільёны жанчын і дзяцей, якія ўцякаюць ад расійскай агрэсіі ў ЕС і суседнія краіны, маюць патрэбу ў належнай падтрымцы і абароне.

У Іране жанчыны церпяць жорсткае абыходжанне, эксплуатацыю, прыгнёт, пераслед, турэмнае зняволенне, штрафы і збіццё за патрабаванні свабоды і роўнасці. У Аўганістане Талібан ліквідаваў усе механізмы абароны, створаныя за апошнія 20 гадоў для абароны жанчын і дзяўчынак ад жорсткага абыходжання, гвалту і прымусовых шлюбаў. Жанчыны таксама сутыкаюцца з гвалтам падчас гуманітарных крызісаў ад М'янмы да паўночнай Эфіопіі і Дэмакратычнай Рэспублікі Конга.

Мы па-ранейшаму цвёрда маем намер пакласці канец гвалту ў адносінах да жанчын унутры і за межамі ЕС. ЕС салідарны з жанчынамі і дзяўчынкамі, з ахвярамі гвалту. Мы працягнем падтрымліваць грамадзянскую супольнасць, жаночыя праваабарончыя арганізацыі і праваабаронцаў, патрабуючы падсправаздачнасці».

Для даведкі

Сёння Еўрапейская камісія аб'яўляе уніфікаваны для ўсяго ЕС нумар тэлефона даверу для ахвяраў гвалту ў адносінах да жанчын – 116 016. Жанчыны, якія сталі ахвярамі гвалту, змогуць тэлефанаваць па гэтым нумары па ўсім ЕС, каб атрымаць кансультацыю і падтрымку. На гэты момант 15 дзяржаў-членаў абавязаліся падключыць да гэтага нумара сваю існуючую тэлефонную лінію дапамогі ахвярам гвалту ў адносінах да жанчын. Апошні тэрмін для дзяржаў-членаў, каб зарэзерваваць агульны нумар ЕС для падключэння да нацыянальных тэлефонаў даверу, – канец красавіка 2023 года.

Еўрапейская камісія аддана прадухіленню гендарнага гвалту і барацьбе з ім, як пазначана ў Стратэгіі гендарнай роўнасці ЕС на 2020–2025 гады. План дзеянняў "Еўрапейская аснова сацыяльных правоў" пацвярджае абавязацельства прапаноўваць новыя правілы, каб пакласці канец гендарнаму гвалту ў адносінах да жанчын, уключаючы дамаганні на працы па прыкмеце полу. Камісія дае фінансаванне праектам і арганізацыям па барацьбе з гендарным гвалтам у рамках праграмы «Грамадзяне, роўнасць, правы і каштоўнасці».

8 сакавіка 2022 года Еўрапейская камісія прыняла праект дырэктывы па барацьбе з гвалтам у дачыненні да жанчын і гвалтам у сям'і. Праект накіраваны на тое, каб найбольш сур'ёзныя формы гвалту ў дачыненні да жанчын былі крыміналізаваныя па ўсім ЕС, такія як згвалтаванне, якія калечаць аперацыі на жаночых палавых органах і гендарны кібергвалт, уключаючы кіберпераслед і няўзгоднены абмен інтымнымі выявамі.

11 мая 2022 года Камісія прыняла праект Рэгламенту аб прадухіленні сэксуальнага гвалту над дзецьмі і барацьбе з ім. Прапанаваны рэгламент абавяжа правайдэраў выяўляць, адзначаць і выдаляць матэрыялы, якія змяшчаюць сэксуальны гвалт над дзецьмі.

Камісія працягвае працу па далучэнні ЕС да Канвенцыі Савета Еўропы аб прадухіленні і барацьбе з гвалтам у дачыненні да жанчын і хатнім гвалтам –  Стамбульскай канвенцыі.

Паралельна Камісія працуе над рэалізацыяй сваёй першай Стратэгіі ЕС па правах ахвяр (2020-2025 гг.), у тым ліку магчымы перагляд у 2023 г.

Большасць ахвяр гандлю людзьмі, выяўленых у ЕС, складаюць жанчыны і дзяўчынкі. Прававая і палітычная база ЕС выкладзена ў Дырэктыве па барацьбе з гандлем людзьмі. У красавіку 2021 г. Камісія прадставіла Стратэгію ЕС па барацьбе з гандлем людзьмі (2021-2025 гг.), у якой робіцца ўпор на абарону ахвяр на ўсіх этапах з улікам, у прыватнасці, жанчын і дзяцей, а таксама гандлю людзьмі ў мэтах сексуальнай эксплуатацыі. Камісія працягне ўмацоўваць меры па барацьбе з гандлем людзьмі і плануе прапанаваць перагляд Дырэктывы па барацьбе з гандлем людзьмі ў снежні 2022 года.

На міжнародным узроўні План дзеянняў па забеспячэнні гендарнай роўнасці і пашырэнні правоў і магчымасцяў жанчын у знешніх адносінах на 2020–2025 гады (GAP III) прадастаўляе амбіцыйную аснову знешняй палітыкі для дасягнення прагрэсу ў галіне гендарнай роўнасці і пашырэння правоў і магчымасцяў жанчын. ЕС працягне свае намаганні па ўтаймаванні сэксуальнага і гендарнага гвалту ва ўсім свеце, у тым ліку ва ўмовах канфліктаў і надзвычайных сітуацый. Напрыклад, глабальная ініцыятыва Spotlight, якая прадугледжвае першапачатковыя інвестыцыі ЕС у памеры 500 мільёнаў еўра, накіравана на выкараненне ўсіх форм гвалту ў адносінах да жанчын і дзяўчынак. Больш за тое, ЕС з'яўляецца актыўным удзельнікам Закліку да дзеянняў па абароне ад гендарнага гвалту ў надзвычайных сітуацыях, глабальнай ініцыятывы з удзелам больш за 100 зацікаўленых бакоў, якая накіравана на стымуляванне зменаў і павышэнне падсправаздачнасці з боку гуманітарнай сістэмы для вырашэння праблемы гендарнага гвалту з самых ранніх фаз крызісу.

Еўрапейская камісія кожны год удзельнічае ў кампаніі ААН-жанчыны Orange the World. Фатаграфіі членаў Камісіі ў аранжавых шаліках будуць даступныя на старонцы Аўдыёвізуальнай службы з пятніцы, 25 лістапада.

Дадатковая інфармацыя

Ending gender-based violence

Factsheet – championing Gender Equality

Website – EU-wide number for helplines for victims of violence against women