IV Халықаралық Қазақстан музей конгресі – «Қазақстан – Франция 2026» Музеология форумы

Кешенді іс-шараның мақсаты – музей ісі саласындағы ынтымақтастықты нығайту, инновациялық және цифрлық даму стратегияларын талқылайтын кәсіби диалог алаңын құру.

Негізгі міндеттері:

• Музейлердің ғылыми-зерттеу әлеуетін арттыру;

• 3D визуализация, виртуалды көрмелер сияқты цифрлық технологиялар тәжірибесімен бөлісу;

• Мәдени дипломатия мен халықаралық әріптестікті, соның ішінде Қазақстан мен Франция арасындағы мәдени байланысты дамыту.

Іс-шара бағдарламасы мен форматы:

Жиын құрылымы салалық мәселелерді терең талқылауға бағытталған екі негізгі бөлімнен тұрады:

19 мамыр – IV Халықаралық Қазақстан музей конгресі. Бұл күні музей заттарын цифрландыру, «E-museum» веб-порталын жүргізу және түркі әлемі музейлерінің интеграциясы мәселелері талқыланады.

Конгресс аясында келесі ғылыми-практикалық іс-шараларды өткізу жоспарланған:

I секция: ««E-museum» веб-порталы: мемлекеттік каталогты жүргізу және музей заттарын цифрландыру мәселелері» атты республикалық семинар-тренинг. Семинар-тренингтің мақсаты – «E-museum» веб-порталы арқылы музей қорын есепке алу және мемлекеттік каталогты жүргізудің негізгі қағидаттарымен таныстыру, музей заттарын цифрландырудың заманауи әдістері бойынша тәжірибемен бөлісу.

II секция: «Түркі әлемі музейлері: ортақ мұра, интеграция және бірлескен жобалар» атты дөңгелек үстел.

Қатысушылар: АҚШ (Смитсон институты), Түркия, Өзбекстан, Қырғызстан және Әзербайжанның беделді сарапшылар, музей директорлары мен ғалымдар. Сондай-ақ, еліміздің барлық өңірінен музей мамандары мен мәдениет қызметкерлері.

20-21 мамыр – «Қазақстан – Франция 2026» Музеология форумы. Форумда мәдени дипломатия, жәдігерлерді консервациялау, жаңа технологиялар және материалдық емес мәдени мұра тақырыптарында секциялық отырыстар мен B2B кездесулер, шеберлік сабақтары ұйымдастырылады.

«Қазақстан – Франция 2026» Музеология форумы 4 секциядан тұрады:

І секция: Мәдени дипломатия және музейлік жобалар;

ІІ секция: Мәдени мұраны басқару: сақтау және жаңғырту;

ІІІ секция: Цифрлық музей: инновациялық шешімдер мен тәжірибе;

ІV секция: Материалдық емес мәдени мұра: киіз басу өнері.

Қатысушылар: Форумға Францияның Musée du Quai Branly, ICONEM, BnF, France museums, Paris museums өкілдері, Өзбекстан мен Қырғызстаннан келген музей директорлары, ғалымдар мен сарапшылар, сондай-ақ, еліміздің барлық өңірінен музей мамандары мен мәдениет қызметкерлері қатысады.

Іс-шараның өтетін орны: ҚР Ұлттық музейі, Тәуелсіздік даңғылы, 54, Үлкен конференция залы 

Өтетін күні: 19-21 мамыр 2026 жыл 

СЕРІКТЕСТЕР ТУРАЛЫ

ЕУРОПАЛЫҚ ОДАҚ 

Еуропалық Одақ – Еуропаның 27 елінен тұратын экономикалық және саяси одақ. Ол – адамның қадір-қасиетін, бостандық, демократия, теңдік, заң үстемдігі мен адам құқықтарын құрметтеу құндылықтарына негізделген, сондай-ақ Еуропаның мәдени, діни және гуманистік мұрасына сүйенеді. Қоғам, қоршаған орта және экономиканың тұрақты дамуына жәрдемдесу үшін әркімнің пайдасына орай жаһандық деңгейде әрекет етеді. 

ALIPH ҚОРЫ | атқарушы директор – Валери Фрелан (Valery Freland)

Aliph - қақтығыс аймақтарында немесе табиғи апаттан зардап шеккен өңірлерде мәдени мұраны іс жүзінде сақтаумен айналысатын халықаралық қор. ЮНЕСКО-мен стратегиялық әріптестік аясында қор қауіп төнген нысандарды қалпына келтіру шараларын жүзеге асырып, оларды Дүниежүзілік мұра тізіміне енгізуге жәрдемдеседі.

ПАРИЖ МУЗЕЙЛЕРІ БІРЛЕСТІГІ (PARIS MUSÉES) | Клеманс Прюдо-Д’Авиньи (Clémence Prudot d’Avigny), мәдени сараптама жобасының жетекшісі

«Paris Musées» - Еуропадағы ең ірі музей желілерінің бірі. Оның мақсаты Париж қаласы музейлерінің 1 миллионнан астам өнер туындысынан тұратын коллекцияларын сақтау және насихаттау. Бұл желіге 14 париждік музей кіреді.

FRANCE MUSEUMS | Альбер Наим (Albert Naïm)

Таяу Шығыс және Азия елдері бойынша бизнес-даму менеджері

France Museums - музейлер мен мәдени мұра нысандарын жаңғырту барысында кеңес беру және жобалау қызметтерін көрсететін мәдени агенттік. Ол концепция әзірлеуден бастап, толық іске асыруға дейінгі қызметтердің кең ауқымын ұсынады.

ҰЛТТЫҚ ЕСКЕРТКІШТЕР ОРТАЛЫҒЫ (CMN) | Дельфин Буэ (Delphine Bouet)

оқыту және мәдени инженерия бөлімінің жетекшісі

CMN бір ғасырдан астам уақыт бойы Франциядағы тарихи орындар мен ескерткіштердің ең ірі желісін біріктіріп келеді - ежелгі дәуірден бүгінгі күнге дейін. Цифрлық технологиялардың арқасында орталық келушілерге жаңа тәжірибе ұсынады (виртуалды шындық, геолокациясы бар құрылғылар, иммерсивті маршруттар, түнгі қойылымдар, интерактивті планшеттер және т.б.).

МӘДЕНИ МҰРАНЫ САҚТАУ ЖӘНЕ ҚАЛПЫНА КЕЛТІРУ ПӘНАРАЛЫҚ ОРТАЛЫҚ – МАРСЕЛЬ (CICRP) | Доминик Вантан (Dominique Vingtain), директор

Доминик Вантан - мәдени мұраны сақтау саласының маманы, тарих ғылымдарының докторы (сәулет). Қазіргі уақытта Марсельдегі CICRP орталығын басқарады. Орталық мәдени мұраны алдын алу консервациясы мен реставрациясымен айналысады.

ICONEM | Леони Крюан (Léonie Cruanes), жобаларды дамыту жөніндегі жетекші

Iconem - дүниежүзілік мұра нысандарын сақтау және танымал етумен айналысатын инновациялық компания. Дрондар арқылы деректер жинау және жасанды интеллект негізіндегі өңдеу әдістерін қолдана отырып, жоғалу қаупі бар нысандардың жоғары дәлдіктегі 3D-модельдерін жасайды.

БРАНЛИ ЖАҒАЛАУЫНДАҒЫ МУЗЕЙ | Фред Чи Чья Чунг (Fred Chih Chia Chung), мәдени даму жөніндегі директордың орынбасары

Жак Ширак атындағы Бранли жағалауындағы музей - әрі музей, әрі ғылыми білім беру орталығы: бүкіл әлемге ашық алаң, онда әртүрлі тұрғыдан түсіндіруге және түрлі көзқараспен қарастыруға болатын көркем, мәдени және ғылыми жобалар ұсынылады.

Фред Чи Чья Чунг мәдени даму жөніндегі директордың орынбасары болып табылады, сондай-ақ көшпелі көрмелер мен халықаралық ынтымақтастықты қадағалайды.

EXPERTISE FRANCE | Анн Лижи (Anne Liegey), халықаралық техникалық сарапшы, мұра, мәдени және креативті индустриялар

Анн Лижи - мүсіндерді қалпына келтіруші маман, кеуекті материалдарды тұзсыздандыру және нығайту бойынша маманданған. Ол «Expertise France» агенттігінің халықаралық жобалары аясында жұмыс істейді. Агенттік дамушы және нарығы қалыптасып келе жатқан елдерде мемлекеттік саясатты тұрақты жетілдіруге бағытталған жобаларды жүзеге асырады. Соңғы 10 жылда ұйым халықаралық техникалық ынтымақтастықта маңызды рөл атқарып келеді.

HW ARCHITECTURE СӘУЛЕТ БЮРОСЫ | Ала Варде (Hala Warde), сәулетші

Ала Варде 1965 жылы Ливанда туған, Париждегі Арнайы сәулет мектебін тәмамдаған. 2008 жылы HW architecture бюросын құрды. Оның жобаларына Лондондағы One New Change кешені (2010) және 2006 жылдан бастап жетекшілік еткен Абу-Дабидегі Лувр музейі (2017) кіреді.

ЖОҒАРЫ ҚАЛЫПТЫ МЕКТЕП (ENS, ПАРИЖ) | Александр Казеруни (Alexandre Kazerouni), PhD, профессор, саясаттанушы

Александр Казеруни - қазіргі мұсылман әлемінің саяси социологиясы бойынша зерттеуші және оқытушы. ENS - Париж-Сакле университетінің құрамына кіретін беделді жоғары оқу орны.

ПАРИЖ-МАЛАКЕ ЖОҒАРЫ ҰЛТТЫҚ СӘУЛЕТ МЕКТЕБІ | Фредерик Моро (Frederic Moreau), халықаралық ынтымақтастық бөлімінің жетекшісі

Фредерик Моро - халықаралық мәдени қызмет және жоғары көркем білім беру саласының танымал сарапшысы. Қазіргі уақытта ол Париж зерттеу университеті (PSL) құрамына кіретін Париж-Малаке Жоғары ұлттық сәулет мектебінің халықаралық байланыстар бөлімін басқарып, оқу орнының халықаралық стратегиясын үйлестіреді.

ФРАНЦИЯ ҰЛТТЫҚ КІТАПХАНАСЫ |

Лоран Эрише (Laurent Héricher) - Шығыс қолжазбалары қызметінің жетекшісі

Алис Шеврие (Alice Chevrier) - халықаралық ынтымақтастық қызметінің жетекшісі

Лоран Эрише - Франция Ұлттық кітапханасының шығыс қолжазбалары бөлімінің басшысы және еврей қолжазбаларының кураторы, бас сақтаушы.

Алис Шеврие қызметі Франция Ұлттық кітапханасының халықаралық ынтымақтастық пен дамыту бағытындағы міндеттеріне сәйкес келеді. Ол Азия құрлығындағы серіктес мекемелермен жобаларды үйлестіру және тәжірибе алмасумен айналысады.

DUALEST КОНСАЛТИНГ КОМПАНИЯСЫ | Гийом Дюбюи (Guillaume Dubois)

атқарушы директор

Dualest компаниясы 30 жылдан бері Еуразия аумағында француз кәсіпорындарын қолдап келеді және мәдениет пен музей ісі саласында стратегиялық әріптестіктерді дамытады. Сонымен қатар, Орталық Азияда музейлерді қайта жаңғырту және цифрландыру саласында француз тәжірибесін енгізіп келеді.

Форумға Dualest компаниясымен бірге келесі ұйымдардың өкілдері де қатысады: Memorist, Agence Nathalie Crinière, Image’indoor, Polymorphe design және Bruynzeel