PRINTO

BE-ja dhe Kosova e mbajtën takimin e trembëdhjetë të Grupit të Posaçëm për Reformën e Administratës Publike

09.10.2025
Prishtinë
Ekipi i Shtypit dhe i Informacionit i Zyrës së BE-së / Përfaqësuesit të Posaçëm të BE-së në Kosovë

Bardhyl Dobra, Zëvendësministër i Punëve të Brendshme në detyrë për Kosovën, dhe Julien Crampes, Zëvendësshef i DP të Komisionit Evropian për Zgjerim dhe Fqinjësi Lindore për Serbinë, e bashkëkryesuan sot në Prishtinë takimin e trembëdhjetë të Grupit të Posaçëm BE-Kosovë për Reformën e Administratës Publike (RAP).

Ky takim, i cili mblodhi përfaqësues nga Komisioni Evropian dhe Kosova, u fokusua në planet dhe përparimin e bërë nga autoritetet vendase drejt sigurimit të një shërbimi civil profesional, me llogaridhënie të shtuar dhe siguri ligjore më të lartë përkitazi me ofrimin e shërbimeve për qytetarët dhe bizneset.

Në përputhje me raportin e Komisionit Evropian për Kosovën për vitin 2024 dhe zotimet për reforma që Kosova i ka marrë si pjesë e Planit për Reforma dhe Rritje, Komisioni e inkurajoi Kosovën që ta përshpejtojë zbatimin efikas të Strategjive për RAP dhe Menaxhim të Financave Publike (MFP), duke përfshirë konsultimet e rregullta me publikun dhe shoqërinë civile.

Me kornizën ligjore të rishikuar për shërbimin publik të Kosovës, me të cilën parashihen një varg reformash gjithëpërfshirëse që po zbatohen gradualisht, përfaqësuesit e KE-së e theksuan rëndësinë e trajtimit të sfidave të vazhdueshme, e veçanërisht lansimin e një sistemi të centralizuar të rekrutimit në shërbimin publik, zvogëlimin e numrit të emërimeve në poste të ushtruesve të detyrave menaxheriale dhe përfundimin e hapave të nevojshëm për zbatimin e reformës për pagat.

KE-ja e mirëpriti përparimin e bërë në zbatimin e agjendës digjitale dhe strategjisë për qeverisje elektronike për ta përmirësuar më tej ofrimin e shërbimeve të orientuara kah qytetarët, si dhe të programit për reduktimin e barrës administrative.

Duke raportuar për përparimin e bërë, Kosova e prezantoi Raportin për Menaxhimin e Burimeve Njerëzore për vitin 2024, i cili për herë të parë u publikua në shtator të vitit 2025. Duke u bazuar në këtë raport, Kosova bëri të ditur se rekrutimet e grave dhe të rinjve në vitin 2024 janë rritur krahasuar me vitin 2023, ndërsa procedurat e rekrutimit kanë tërhequr numër më të madh të aplikuesve.

Kosova është e përkushtuar që t’i zbatojë plotësisht strategjitë e saj për RAP dhe MFP dhe që të sigurojë që objektivat e tyre të realizohen sipas planit.

Kosova dhe Komisioni Evropian u pajtuan që ta rrisin më tej bashkëpunimin, përfshirë atë në nivel teknik, në mënyrë që reformat e ndërmarra të zbatohen plotësisht sa më shpejt të jetë e mundur.

Historik

  • Marrëveshja e Stabilizim-Asociimit (MSA-ja) është korniza për BE-në dhe administratën e Kosovës për të diskutuar rregullisht çështje teknike dhe politike lidhur me reformat që kanë të bëjnë me BE-në. Organet e MSA-së përfshijnë Këshillin e Stabilizim-Asociimit, të ndihmuar nga Komiteti i Stabilizim-Asociimit, si dhe Nënkomitetet e MSA-së, të cilat e mbulojnë një gamë të gjerë të acquis të BE-së. Takimet e organeve të MSA-së japin kontribut të drejtpërdrejtë në raportet vjetore të Komisionit Evropian.

  • Në secilin takim të cilitdo nënkomitet monitorohet dhe shoqërohet zbatimi i reformave nga ana e Kosovës dhe identifikohen mënyrat se si BE-ja mund të ndihmojë në këtë proces.

  • Janë shtatë fusha që mbulohen përmes takimeve sektoriale të nënkomiteteve: për drejtësinë, lirinë dhe sigurinë; inovacionin, shoqërinë e informacionit, politikën sociale, arsimin dhe kulturën; tregtinë, industrinë, doganat dhe tatimet; tregun e brendshëm, konkurrencën, mbrojtjen e konsumatorit dhe shëndetit; bujqësinë, peshkimin, pylltarinë, sigurinë ushqimore; transportin, mjedisin, energjinë, ndryshimet klimatike dhe zhvillimin rajonal; çështjet ekonomike dhe financiare, statistikat.

  • Dy fusha të tjera që mbulohen përmes takimeve të grupeve të posaçme janë reforma e administratës publike dhe normalizimi i marrëdhënieve midis Kosovës dhe Serbisë.

  • Takimet e Komitetit dhe Nënkomiteteve të MSA-së bashkëkryesohen nga Komisioni Evropian dhe Kosova. Çdo takim rezulton në veprime shoqëruese të dakorduara bashkërisht që duhet të ndërmerren nga autoritetet e Kosovës. Koha midis takimeve e mundëson zbatimin e rekomandimeve dhe veprimeve shoqëruese të dakorduara.

 

Për më shumë informata, kontaktoni:

Bashkimi Evropian në Kosovë: Nikola GAON SOROKIN, nikola.gaon-sorokin@ext.eeas.europa.eu 

Selia e Komisionit Evropian: Alexander FRICKE, alexander.fricke@ec.europa.eu 

Ministria e Punëve të Brendshme: Edmir Sejdiu, edmir.sejdiu@rks-gov.net