ສປປ ລາວ ແລະ ສະຫະພາບ ເອີຣົບ ສະເຫຼີມສະຫຼອງ 50 ປີ ແຫ່ງການສ້າງຕັ້ງສາຍພົວພັນການທູດ
ການເດີນທາງຮ່ວມກັນຂອງຫ້າທົດສະວັດ
ວັນທີ 10 ທັນວາ, ສາທາລະນະລັດ ປະຊາທິປະໄຕ ປະຊາຊົນລາວ (ສປປ ລາວ) ແລະ ສະຫະພາບ ເອີຣົບ ໄດ້ຮ່ວມກັນສະເຫຼີມສະຫຼອງວັນຄົບຮອບ 50 ປີ ແຫ່ງການພົວພັນການທູດເຊິ່ງຖືເປັນນິມິດໝາຍອັນສຳຄັນຂອງການພົວພັນຮ່ວມມືທີ່ໄດ້ຮັບການຂະຫຍາຍຕົວຢ່າງ ເລິກເຊິ່ງ ແລະ ມີເປົ້າໝາຍຮ່ວມກັນມາແຕ່ປີ 1975.
ສາຍພົວພັນລະຫວ່າງ ສປປ ລາວ - ສະຫະພາບ ເອີຣົບ ໄດ້ສ້າງຕັ້ງຂຶ້ນຄັ້ງທໍາອິດ ໃນວັນທີ 21 ພະຈິກ 1975 ເມື່ອປະຊາຄົມ ເອີຣົບ ຫຼື European Communities ໃນເມື່ອກ່ອນ ໄດ້ຕອບຮັບການສະເໜີຂອງ ສະຖານເອກອັກຄະລັດຖະທູດ ສປປ ລາວ ປະຈໍາ ຝຣັ່ງ ໃນການສ້າງຕັ້ງສາຍພົວພັນຢ່າງເປັນທາງການ. ຕໍ່ມາ, ສປປ ລາວ ກໍ່ໄດ້ຖືກສະຖາປະນາຂຶ້ນ ແລະ ເອກອັກຄະລັດຖະທູດ ສປປ ລາວ ປະຈໍາ ຝຣັ່ງ ໄດ້ກາຍເປັນຜູ້ຕາງໜ້າຂອງ ສປປ ລາວ ຜູ້ທຳອິດ ປະຈຳ ປະຊາຄົມ ເອີຣົບ ເຊິ່ງເປັນຊ່ວງເວລາສໍາຄັນທີ່ໄດ້ວາງຮາກຖານສໍາລັບການຮ່ວມມືທີ່ໃຫ້ແກ່ການຮ່ວມມືທີ່ມີການພັດທະນາຢ່າງຕໍ່ເນື່ອງ.
ເມື່ອປະຊາຄົມ ເອີຣົບ ໄດ້ປ່ຽນມາເປັນ ສະຫະພາບ ເອີຣົບ ຕາມສົນທິສັນຍາມາດທຣິດ (Maastricht Treaty) ໃນປີ 1993, ການຮ່ວມມື ໄດ້ມີການຂະຫຍາຍຕົວ ໂດຍມີຂົງເຂດການເມືອງເພີ່ມເຂົ້າມາ. ໂອກາດດັ່ງກ່າວ ໄດ້ນຳໄປສູ່ການລົງນາມໃນຂໍ້ຕົກລົງການຮ່ວມມື ສປປ ລາວ - ສະຫະພາບ ເອີຣົບ ໃນປີ 1997 ເຊິ່ງໄດ້ສ້າງຕັ້ງຄະນະກຳມາທິການຮ່ວມລະດັບສູງຂຶ້ນ ເພື່ອຊີ້ນຳການພົວພັນຂອງທັງສອງຝ່າຍ ຕະຫຼອດເຖິງການປຶກສາຫາລືກ່ຽວກັບນະໂຍບາຍການພັດທະນາ, ການຄ້າ ແລະ ສິດທິມະນຸດຢ່າງເປັນປະຈໍາ.
ສປປ ລາວ ແລະ ສະຫະພາບ ເອີຣົບ ໄດ້ເພີ່ມທະວີການພົວພັນທາງການທູດ ໂດຍການສ້າງຕັ້ງສຳນັກງານຜູ້ຕາງໜ້າ ໃນນະຄອນຫຼວງຂອງກັນ ແລະ ກັນ ດັ່ງນີ້: ສປປ ລາວ ໄດ້ແຕ່ງຕັ້ງເອກອັກຄະລັດຖະທູດ ສປປ ລາວ ປະຈຳ ສະຫະພາບ ເອີຣົບ ຜູ້ທຳອິດ ທີ່ ນະຄອນຫຼວງ ບຣຸກແຊນ ໃນປີ 1998 ແລະ ສະຫະພາບ ເອີຣົບ ໄດ້ສ້າງຕັ້ງສຳນັກງານຜູ້ຕາງໜ້າຢູ່ ນະຄອນຫຼວງວຽງຈັນ ໃນປີ 2003, ຕໍ່ມາໃນປີ 2016 ໄດ້ຍົກລະດັບເປັນສຳນັກງານຄະນະຜູ້ແທນ ສະຫະພາບ ເອີຣົບ ປະຈຳ ສປປ ລາວ ເຕັມຮູບແບບເຊິ່ງນໍາພາໂດຍເອກອັກຄະລັດຖະທູດຂອງສະຫະພາບ ເອີຣົບ ປະຈຳ ສປປ ລາວ.
ຕະຫຼອດໄລຍະ 5 ທົດສະວັດທີ່ຜ່ານມາ, ການແລກປ່ຽນການຢ້ຽມຢາມລະດັບສູງຫຼາຍໆຄັ້ງ ໄດ້ເສີມສ້າງຄວາມໄວ້ເນື້ອເຊື່ອໃຈທາງດ້ານການເມືອງໃຫ້ແຂງແກ່ງຍິ່ງຂຶ້ນ. ໃນໄລຍະບໍ່ດົນມານີ້ ໄດ້ມີການຢ້ຽມຢາມຂອງບັນດາຜູ້ນຳສະຫະພາບ ເອີຣົບ ໃນໄລຍະທີ່ ສປປ ລາວ ເປັນປະທານອາຊຽນ ໃນປີ 2024 ແລະ ທ່ານ ທອງສະຫວັນ ພົມວິຫານ, ລັດຖະມົນຕີກະຊວງການຕ່າງປະເທດຂອງ ສປປ ລາວ, ໄດ້ເຂົ້າຮ່ວມກອງປະຊຸມປຶກສາຫາລື ລັດຖະມົນຕີຕ່າງປະເທດ ສະຫະພາບ ເອີຣົບ ອິນໂດ-ປາຊີຟິກ ຄັ້ງທີ 4 ທີ່ນະຄອນຫຼວງບຣຸກແຊນ ໃນເດືອນພະຈິກ ທີ່ຜ່ານມາ ເຊິ່ງກົງກັບວັນຄົບຮອບການສ້າງຕັ້ງສາຍພົວພັນການທູດໃນວັນທີ 21 ພະຈິກ. ໂອກາດດັ່ງກ່າວ, ທ່ານນາງ Kaja Kallas, ຮອງປະທານກຳມາທິການ, ຜູ້ຕາງໜ້າລະດັບສູງດ້ານນະໂຍບາຍ ແລະ ຄວາມໝັ້ນຄົງຂອງ ສະຫະພາບ ເອີຣົບ ແລະ ທ່ານ ທອງສະຫວັນ ພົມວິຫານ, ລັດຖະມົນຕີກະຊວງການຕ່າງປະເທດ ໄດ້ແລກປ່ຽນສານສະແດງຄວາມຍິນດີ ໃນໂອກາດຄົບຮອບ 50 ປີ ແຫ່ງການສ້າງຕັ້ງສາຍພົວພັນການທູດ.
EU in Laos
ຜົນສຳເລັດແຫ່ງການຮ່ວມກັນທີ່ພົ້ນເດັ່ນ
ມາຮອດປະຈຸບັນ, ການຮ່ວມມື ລະຫວ່າງ ສປປ ລາວ ແລະ ສະຫະພາບ ເອີຣົບ ໄດ້ສຸມໃສ່ການພັດທະນາແບບຍືນຍົງ ແລະ ຖືເອົາປະຊາຊົນເປັນໃຈກາງມາຢ່າງຕໍ່ເນື່ອງ. ໃນເບື້ອງຕົ້ນ, ການຮ່ວມມື ແມ່ນສຸມໃສ່ການແກ້ໄຂຜົນກະທົບທີ່ຕົກຄ້າງແຕ່ປາງສົງຄາມ, ໂດຍຜ່ານການຊ່ວຍເຫຼືອດ້ານວຽກງານການເກັບກູ້ລະເບີດບໍ່ທັນແຕກ (UXO), ຊ່ວຍຊີວິດຄົນ ແລະ ມອບດິນຄືນໃຫ້ປະຊາຊົນໄດ້ນຳໃຊ້ປະໂຫຍດຢ່າງຄຸ້ມຄ່າທີ່ສຸດ.
ປະຈຸບັນ, ດ້ວຍການເຮັດວຽກພາຍໃຕ້ທີມ ເອີຣົບ ເຊິ່ງປະກອບມີສະຫະພາບ ເອີຣົບ ຮ່ວມກັບ 7 ປະເທດສະມາຊິກ - ແບນຊິກ, ແຟງລັງ, ຝຣັ່ງ, ເຢຍລະມັນ, ຮົງກາຣີ, ອຽກລັງ ແລະ ລຸກຊຳບວກ - ແລະ ປະເທດ ສະວິດ ໄດ້ຮ່ວມກັນສືບຕໍ່ສະໜັບສະໜູນບັນດາຂົງເຂດບູລິມະສິດຂອງການພັດທະນາແຫ່ງຊາດທີ່ສໍາຄັນ, ລວມມີການປັບປຸງຄຸນນະພາບການສຶກສາ ແລະ ການພັດທະນາສີມືແຮງງານ, ການເຂົ້າເຖິງການບໍລິການດ້ານສຸຂະພາບຂອງແມ່ ແລະ ເດັກໃຫ້ດີຂຶ້ນ, ປັບປຸງຄວາມໝັ້ນຄົງທາງດ້ານສະບຽງອາຫານ ແລະ ໂພຊະນາການ ແລະ ສົ່ງເສີມວຽກງານສິດທິມະນຸດ, ການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ.
ນອກນັ້ນ, ການສະໜັບສະໜູນໃນຂົງເຂດກະສິກຳແບບຍືນຍົງ ແລະ ການປະຕິບັດທີ່ທົນທານຕໍ່ສະພາບດິນຟ້າອາກາດ ກໍ່ໄດ້ຮັບຄວາມຄືບໜ້າທີ່ເປັນຮູບປະທຳ. ການສະໜັບສະໜູນຂອງ ສະຫະພາບ ເອີຣົບ ໄດ້ຊ່ວຍພັດທະນາລະບົບຕ່ອງໂສ້ການສະໜອງທາງດ້ານກະສິກຳທີ່ມີມູນຄ່າສູງເຊັ່ນ: ກາເຟ, ຊາ ແລະ ຜະລິດຕະພັນໄມ້ ຄຽງຄູ່ໄປກັບການຄຸ້ມຄອງປ່າໄມ້, ການອະນຸລັກຊີວະນາໆພັນ ແລະ ການຟື້ນຟູທີ່ດິນ.
ການເຊື່ອມໂຍງ-ເຊື່ອມຈອດ ໄດ້ກາຍເປັນຂົງເຂດສຳຄັນຂອງການຮ່ວມມື. ໂດຍຜ່ານຂໍ້ລິເລີ່ມຂອງແຜນງານ Global Gateway, ສະຫະພາບ ເອີຣົບ ໄດ້ລົງທຶນເຂົ້າໃນການພັດທະນາພື້ນຖານໂຄງລ່າງການຂົນສົ່ງແບບຍືນຍົງ ທີ່ເຊື່ອມໂຍງຜູ້ຄົນ, ສິນຄ້າ ແລະ ໂອກາດຕ່າງໆພາຍໃນ ສປປ ລາວ ແລະ ພາກພື້ນອາຊຽນ ເຊິ່ງສະໜັບສະໜູນທ່າແຮງຂອງ ສປປ ລາວ ໃນການເປັນຂົວຕໍ່ການເຊື່ອມໂຍງ ແລະ ການພັດທະນາເສດຖະກິດໃນພາກພື້ນ.
EU in Laos
ການຮ່ວມມືເພື່ອອະນາຄົດ
ການພົວພັນລະຫວ່າງ ສປປ ລາວ ແລະ ສະຫະພາບ ເອີຣົບ ໄດ້ກາຍເປັນຄູ່ຮ່ວມມືຮອບດ້ານ ແລະ ມີວິໄສທັດໄປຂ້າງໜ້າ ໂດຍໄດ້ລົງເລິກການຮ່ວມມືດ້ານການເມືອງ, ການປົກຄອງທີ່ດີ, ສິດທິມະນຸດ, ການພັດທະນາແບບຍືນຍົງ, ຮັບມືກັບບັນຫາຄວາມໝັ້ນຄົງໃນພາກພື້ນ ແລະ ສິ່ງທ້າທາຍຂອງໂລກເຊັ່ນ: ການປ່ຽນແປງຂອງສະພາບດິນຟ້າອາກາດ.
ສປປ ລາວ ແລະ ສະຫະພາບ ເອີຣົບ ໄດ້ມຸ່ງໝັ້ນທີ່ຈະສືບຕໍ່ລົງເລິກການຮ່ວມມືໃນຂົງເຂດຕ່າງໆເຊັ່ນ: ການຫັນປ່ຽນສີຂຽວ ແລະ ດິຈິຕອນ, ສົ່ງເສີມການລົງທຶນທີ່ມີຄວາມຮັບຜິດຊອບ ແລະ ຄຸນນະພາບສູງ, ການສ້າງຂີດຄວາມສາມາດ ແລະ ສົ່ງເສີມການມີສ່ວນຮ່ວມຂອງອົງການຈັດຕັ້ງສັງຄົມ. ຜ່ານແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ 10, ສະຫະພາບ ເອີຣົບ ຢໍ້າຄືນຄຳໝັ້ນສັນຍາຂອງຕົນ ໃນການສະໜັບສະໜູນເປົ້າໝາຍໄລຍະຍາວຂອງ ສປປ ລາວ ໃນຖານະເປັນຄູ່ຮ່ວມງານທີ່ໜ້າເຊື່ອຖື ແລະ ເປັນຜູ້ປະກອບສ່ວນອັນສຳຄັນ ໃຫ້ແກ່ການສ້າງອະນາຄົດທີ່ຍືນຍົງ ແລະ ຈະເລີນຮຸ່ງເຮືອງຂຶ້ນກວ່າເກົ່າ.
ພິທີສະເຫຼີມສະຫຼອງ ໄດ້ຈັດຂຶ້ນໃນວັນທີ 10 ທັນວາ 2025 ທີ່ ນະຄອນຫຼວງວຽງຈັນ, ໃຫ້ກຽດຂຶ້ນກ່າວມີຄຳເຫັນໂດຍ ທ່ານ ມາກ ກາລາເຮີ, ເອກອັກຄະລັດຖະທູດ ສະຫະພາບ ເອີຣົບ ປະຈຳ ສປປ ລາວ ແລະ ທ່ານ ທອງສະຫວັນ ພົມວິຫານ ລັດຖະມົນຕີ ກະຊວງການຕ່າງປະເທດແຫ່ງ ສປປ ລາວ, ມີບັນດາລັດຖະມົນຕີ, ຮອງລັດຖະມົນຕີ, ເອກອັກຄະລັດຖະທູດ ປະເທດສະມາຊິກ ສະຫະພາບ ເອີຣົບ ປະຈຳ ສປປ ລາວ (ຝຣັ່ງ, ເຢຍລະມັນ, ຮົງກາຣີ, ລຸກຊຳບວກ) ພ້ອມດ້ວຍຜູ້ຕາງໜ້າຈາກພາກລັດ, ເອກະຊົນ, ອົງການຈັດຕັ້ງສັງຄົມ ແລະ ຄະນະທູຕານຸທູດຕ່າງປະເທດ ປະຈຳ ສປປ ລາວ ເຂົ້າຮ່ວມ.
EU in Laos