ສະຫະພາບ ເອີຣົບ ປະຈຳ ສປປ ລາວ ສະເຫຼີມສະຫຼອງວັນເອີຣົບ ເພື່ອຢືນຢັນສາຍພົວພັນອັນແໜ້ນແຟ້ນ
ນະຄອນຫຼວງວຽງຈັນ, ວັນທີ 7 ພຶດສະພາ 2025 - ຄະນະຜູ້ແທນສະຫະພາບ ເອີຣົບ ປະຈຳ ສປປ ລາວ ໄດ້ຈັດພິທີສະເຫຼີມສະຫຼອງຄົບຮອບ 75 ປີ ແຫ່ງວັນຖະແຫຼງການ ຊູມານ ທີ່ນໍາໄປສູ່ການສ້າງຕັ້ງສະຫະພາບ ເອີຣົບ ໃນປັດຈຸບັນ.
ວັນເອີຣົບ ເປັນວັນຄົບຮອບຂອງຖະແຫຼງການ ຊູມານ ເຊິ່ງໄດ້ຈັດຂຶ້ນໃນທຸກປີ ແລະ ໃນປີນີ້ ຖືວ່າມີຄວາມສໍາຄັນພິເສດ ເນື່ອງຈາກວ່າກົງກັບວັນຄົບຮອບທີ່ສໍາຄັນອື່ນໆອີກຫຼາຍວັນໄດ້ແກ່:
- ວັນຄົບຮອບ 105 ປີ ວັນເກີດຂອງອະດີດປະທານ ໄກສອນ ພົມວິຫານ, • ວັນຄົບຮອບ 70 ປີ ແຫ່ງການສ້າງຕັ້ງພັກປະຊາຊົນ ປະຕິວັດລາວ,
- ວັນຄົບຮອບ 50 ປີ ແຫ່ງການສ້າງຕັ້ງ ສປປ ລາວ,
- ວັນຄົບຮອບ 80 ປີ ແຫ່ງການສິ້ນສຸດສົງຄາມໂລກຄັ້ງທີ ສອງ, ລວມທັງວັນຄົບຮອບ 80 ປີ ແຫ່ງໄຊຊະນະໃນເອີຣົບໃນອາທິດນີ້.
ບັນດາເຫດການທີ່ສໍາຄັນເຫຼົ່ານີ້ ແມ່ນຊ່ວງເວລາແຫ່ງການທົບທວນປະຫວັດສາດຮ່ວມກັນຂອງພວກເຮົາ ທີ່ໄດ້ເນັ້ນຢໍ້າເຖິງຄຳໝັ້ນສັນຍາຂອງພວກເຮົາທີ່ມີຕໍ່ສັນຕິພາບ, ຄວາມສາມັກຄີ ແລະ ການຮ່ວມມື ເຊິ່ງເປັນຫຼັກການສ້າງຕັ້ງສະຫະພາບ ເອີຣົບ.
ທ່ານເອກອັກຄະລັດຖະທູດ ສະຫະພາບ ເອີຣົບ ໄດ້ກ່າວວ່າ, “ສະຫະພາບ ເອີຣົບ ຍັງຄົງມຸ່ງໝັ້ນໃນການສົ່ງເສີມສັນຕິພາບ, ລັດທິຫຼາຍຝ່າຍ ແລະ ລະບຽບການສາກົນທີ່ອີງໃສ່ກົດເກນຕ່າງໆ ເຊິ່ງເປັນຄຸນຄ່າທີ່ພວກເຮົາມີຮ່ວມກັບ ສປປ ລາວ ແລະ ອາຊຽນ. ເຖິງແມ່ນວ່າ ໃນໂລກຈະມີຄວາມສັບຊ້ອນ ແລະ ມີຂໍ້ຂັດແຍ້ງກັນຫຼາຍຂຶ້ນ, ພວກເຮົາຍັງເຊື່ອໃນຄວາມສາມັກຄີ, ໃນຄວາມຫຼາກຫຼາຍ ແລະ ຍຶດໝັ້ນຢ່າງໜັກແໜ້ນໃນຄຸນຄ່າສາກົນທີ່ພວກເຮົາຮ່ວມກັນສ້າງໃນສະຫະປະຊາຊາດຕັ້ງແຕ່ປີ 1945.”
ເມື່ອເບິ່ງໄປຂ້າງໜ້າ, ປີ 2025 ຍັງຈະເປັນປີຄົບຮອບ 50 ປີ ແຫ່ງສາຍພົວພັນທາງການທູດລະຫວ່າງສະຫະພາບ ເອີຣົບ ແລະ ສປປ ລາວ. ສະຫະພາບ ເອີຣົບ ຍັງຄົງໃຫ້ຄຳໝັ້ນສັນຍາຢ່າງເລິກເຊິ່ງ ທີ່ຈະເສີມສ້າງການຮ່ວມມືທີ່ໝັ້ນຄົງນີ້ ແລະ ຄົ້ນຄວ້າໃນບັນດາຂົງເຂດການຮ່ວມມືໃໝ່ໆ ເພື່ອສົ່ງເສີມການພັດທະນາແບບຍືນຍົງຂອງປະເທດ ລາວ.
ໃນຂະນະທີ່ສະຫະພາບ ເອີຣົບ ໄດ້ສະເຫຼີມສະຫຼອງວັນເອີຣົບ, ພວກເຮົາຍັງໄດ້ສະເຫຼີມສະຫຼອງຄວາມເຂັ້ມແຂງຂອງການຮ່ວມມືຂອງພວກເຮົາ ກັບ ສປປ ລາວ ຢູ່ບົນພື້ນຖານການເຄົາລົບເຊິ່ງກັນ ແລະ ກັນ ແລະ ມີວິໄສທັດຮ່ວມກັນ ເພື່ອສັນຕິພາບ ແລະ ຄວາມຈະເລີນຮຸ່ງເຮືອງໃນອະນາຄົດ.
ພວກເຮົາສາມາດຮ່ວມກັນຮັກສາຄຸນຄ່າຂອງພວກເຮົາ ແລະ ຢືນຢັດຢ່າງເຂັ້ມແຂງ ໃນໂລກທີ່ເຕັມໄປດ້ວຍການແຂ່ງຂັນ ແລະ ຄວາມບໍ່ໝັ້ນຄົງ.
EUinLaos
EUinLaos
EUinLaos