ສະຫະພາບ ເອີຣົບ ແລະ ສປປ ລາວ ໄດ້ເປີດເສັ້ນທາງມໍລະດົກນະຄອນຫຼວງວຽງຈັນ ເພື່ອອະນຸລັກມໍລະດົກທາງວັດທະນະທຳ ແລະ ສົ່ງເສີມການທ່ອງທ່ຽວ
ນະຄອນຫຼວງວຽງຈັນ, ວັນທີ 18 ທັນວາ 2024 - ໃນຕອນເຊົ້າຂອງວັນນີ້, ສະຫະພາບ ເອີຣົບ ປະຈຳ ສປປ ລາວ ຮ່ວມກັບ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກະຊວງໂຍທາທິການ ແລະ ຂົນສົ່ງ ແລະ ຫ້ອງວ່າການປົກຄອງນະຄອນຫຼວງວຽງຈັນ ໄດ້ເປີດໂຄງການ ເສັ້ນທາງມໍລະດົກນະຄອນຫຼວງວຽງຈັນ ຢ່າງເປັນທາງການ ທີ່ ອະນຸສາວະລີ ປະຕູໄຊ. ໂຄງກ່າວດັ່ງກ່າວ, ມີຈຸດປະສົງເພື່ອອະນຸລັກ ແລະ ສົ່ງເສີມສະຖາປັດຕະຍະກຳທີ່ເປັນມໍລະດົກຂອງນະຄອນຫຼວງວຽງຈັນ ພ້ອມທັງເປັນການຜັນຂະຫຍາຍວຽກງານດ້ານການທ່ອງທ່ຽວ.
ງານດັ່ງກ່າວ ໄດ້ຖືເປັນກຽດຮ່ວມເປີດງານໂດຍ ທ່ານນາງ ສວນສະຫວັນ ວິຍະເກດ, ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແລະ ທ່ານ ນີນ ເລໂອນາກ, ອຸປະທູດ ສະຫະພາບ ເອີຣົບ ປະຈຳ ສປປ ລາວ ພ້ອມທັງຄະນະທູດ ແລະ ບັນດາຄູ່ຮ່ວມງານຕ່າງໆໃນນະຄອນຫຼວງວຽງຈັນ.
ເສັ້ນທາງມໍລະດົກນະຄອນຫຼວງວຽງຈັນ ນຳສະເໜີ 59 ອາຄານປະຫວັດສາດທີ່ເປັນສະຖາປັດຕະຍະກຳຮູບແບບລາວ ແລະ ຕ່າງປະເທດ ເຊິ່ງສື່ໃຫ້ເຫັນເຖິງສະເໜ່ ແລະ ປະຫວັດສາດຂອງເມືອງ. ເສັ້ນທາງດັ່ງກ່າວ ຈະຖືກນຳໃຊ້ເທິງແຜນທີ່, ເວັບໄຊ ແລະ ແຜ່ນພັບອີເລັກໂທຣນິກ ເພື່ອສ້າງປະສົບການທີ່ໜ້າຈົດຈຳໃຫ້ແກ່ນັກທ່ອງທ່ຽວ ແລະ ຄົນໃນທ້ອງຖິ່ນ.
ຖານຂໍ້ມູນ, ແຜ່ນພັບອີເລັກໂທຣນິກ, ແຜນທີ່, ເວັບໄຊ ແລະ ເຄື່ອງມືໂຄສະນາຕ່າງໆ ເຊິ່ງເປັນເຄື່ອງມືອັນທີ່ສຳຄັນໃນການອະນຸລັກ ແລະ ເປັນຂໍ້ລິເລີ່ມໃນການພັດທະນາແບບຍືນຍົງຂອງຕົວເມືອງ ໄດ້ຖືກມອບໃຫ້ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ. ຊັບພະຍາກອນເຫຼົ່ານີ້ ຈະເປັນສ່ວນໜຶ່ງໃນການສົ່ງເສີມການທ່ອງທ່ຽວ ແລະການສະໜອງຂໍ້ມູນທີ່ສາມາດເຂົ້າເຖິງໄດ້ສໍາລັບນັກທ່ອງທ່ຽວ.
ພາຍໃນງານ, ສະຫະພາບ ເອີຣົບ ປະຈຳ ສປປ ລາວ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແລະ ຄູ່ຮ່ວມງານອື່ນໆ ໄດ້ຮ່ວມຂີ່ລົດຕຸກ-ຕຸກ ທ່ຽວຊົມໄປຕາມເສັ້ນມໍລະດົກຂອງນະຄອນຫຼວງວຽງຈັນ ເພື່ອສະເຫຼີມສະຫຼອງ ແລະ ສົ່ງເສີມມໍລະດົກທາງວັດທະນະທຳຂອງຕົວເມືອງ.
ມໍລະດົກທາງວັດທະນະທຳ ແມ່ນພື້ນຖານຂອງຄວາມສາມັກຄີທາງສັງຄົມ, ການຂະຫຍາຍຕົວທາງດ້ານເສດຖະກິດ ແລະ ຄວາມເປັນເອກະລັກປະຈໍາຊາດຊາດ. ໂຄງການເສັ້ນທາງມໍລະດົກນະຄອນຫຼວງວຽງຈັນ ສະແດງໃຫ້ເຫັນເຖິງຄວາມມຸ່ງໝັ້ນຂອງ ສະຫະພາບ ເອີຣົບ ໃນການອະນຸລັກມໍລະດົກ ຄຽງຄູ່ກັບການສົ່ງເສີມການທ່ອງທ່ຽວແບບຍືນຍົງ ຢູ່ ນະຄອນຫຼວງວຽງຈັນ. ສະຫະພາບ ເອີຣົບ ແລະ ສປປ ລາວ ເຮັດວຽກຮ່ວມກັນເພື່ອປົກປັກຮັກສາຊັບສົມບັດທາງວັດທະນະທຳໃຫ້ແກ່ຄົນໃນຮຸ່ນຕໍ່ໄປ.
ທ່ານສາມາດສຳຫຼວດເສັ້ນທາງມໍລະດົກນະຄອນຫຼວງວຽງຈັນໄດ້ທີ່ນີ້: www.vientianeheritage.com
EUinLaos
EUinLaos
EUinLaos