Ташаккули ояндаи ҷавонон: Аврупо ва Осиёи Марказӣ тавассути ташаббуси «DARYA»-и Иттиҳоди Аврупо кӯшишҳои худро муттаҳид мекунанд

Муовинони вазирони маориф ва меҳнати кишварҳои Осиёи Марказӣ рӯзҳои 30 ва 31 октябр дар шаҳри Турин, Италия барои конфронси сатҳи баланд дар доираи лоиҳаи «DARYA» (Муколама ва амал барои ҷавонони боистеъдод дар Осиёи Марказӣ), ки аз ҷониби Иттиҳоди Аврупо маблағгузорӣ мешавад, ҷамъ меоянд. Ин чорабинӣ аз ҷониби Бунёди омӯзишии Аврупо (ETF) таҳти сарпарастии шаҳри Турин баргузор мешавад.

Муовинони вазирон аз Қазоқистон, Қирғизистон, Туркманистон ва Ӯзбекистон бо иштирокчиён, аз ҷумла Эдуард Стипрайс, Намояндаи махсуси Иттиҳоди Аврупо оид ба Осиёи Марказӣ, Пилви Торсти, Директори Бунёди омӯзишии Аврупо (ETF), Микела Фаваро, Муовини раиси шаҳри Турин, Елена Мария Баралис, Муовини ректори Донишгоҳи политехникии Турин, Йоханнес Бауэр, Сардори шӯъбаи ҳамкории Намояндагии Иттиҳоди Аврупо дар Қазоқистон ва Фабиен Ван Ден Эде, Муовини сардори шӯъбаи Директорати генералӣ оид ба шарикии байналмилалии Комиссияи Аврупо, ҳамроҳ мешаванд.

Ин ҷаласаи дурӯза Аврупо ва Осиёи Марказиро барои пешбурди ҳамкорӣ дар соҳаи рушди малакаҳо ва шуғли ҷавонон бо сафарҳои омӯзишӣ ба марказҳои таҷрибаи пешқадам дар минтақаи Пемонт муттаҳид мекунад.

Ин чорабинӣ як марҳилаи муҳим дар шарикии Иттиҳоди Аврупо бо Осиёи Марказӣ дар бунёди системаҳои таълим ва омӯзиши фарогир ва омода барои оянда мебошад.

"Дар ҳоле ки Осиёи Марказӣ нақши стратегии афзояндаеро байни Аврупо ва Осиё мебозад, лоиҳаи «DARYA» ӯҳдадории мутақобилаи моро ба рушди малакаҳо, тақвияти имконоти ҷавонон ва ҳамкории минтақавӣ таҳким менамояд. Таҷрибаи аврупоиро бо афзалиятҳои Осиёи Марказӣ пайваст намуда, «DARYA» ба бунёди ояндаи муштарак ва устувор мусоидат мекунад - ояндае, ки дар он ҷавонон метавонанд маълумоти босифат, кори шоиста ва имкониятҳо барои ташаккули ҷомеаҳои худро ба даст оранд", - қайд намуд Пилви Торсти, директори ETF.

Тақвияти ҳамкорӣ барои малакаҳо ва ҷавонон

Лоиҳаи «DARYA» як ташаббуси панҷсола бо арзиши 10 миллион евро мебошад, ки бо мақсади пешбурди рушди малакаҳои фарогир ва мутобиқ ба бозори меҳнат дар саросари Осиёи Марказӣ аз ҷониби Иттиҳоди Аврупо маблағгузорӣ ва аз ҷониби Бунёди ETF амалӣ карда мешавад. Бо дастгирии ҳамкории минтақавӣ ва ислоҳоти миллӣ, лоиҳа ба афзоиши шуғл, рушди инноватсия ва фароҳам овардани имкониятҳои нав барои ҷавонон нигаронида шудааст.

Конфронс дар Турин бар пояи ин ҳадаф асос ёфта, шарикони аврупоӣ ва Осиёи Марказиро барои муайян кардани моделҳои муассири шарикии малакаҳо, таҳияи муштараки харитаи минтақавии роҳ барои ҳамкории оянда ва омӯхтани равишҳои соҳавӣ, ки метавонанд рақобатпазирӣ ва рушди устуворро дар саросари минтақа афзоиш диҳанд, муттаҳид мекунад.

Қисмҳои калидӣ

Пас аз зиёфати истиқболӣ, ки аз ҷониби ETF ва Донишгоҳи Политехникии Турин ташкил мешавад, ифтитоҳи расмии чорабинӣ рӯзи панҷшанбе, 30 октябри соли 2025, дар қароргоҳи ETF дар Турин (Виллаи Гуалино) баргузор мешавад.

09:00 – 09:25 | Сухани ифтитоҳӣ

• Пилви Торсти, Директори ETF
• Микела Фаваро, Муовини раиси ш. Турин
• Елена Мария Баралис, Муовини ректори Донишгоҳи политехникии Турин

09:25 – 09:40 | Ифтитоҳи расмӣ

• Эдуардс Стипрайс, Намояндаи махсуси Иттиҳоди Аврупо оид ба Осиёи Марказӣ

09:40 – 10:40 | Мизи мудаввар бо муовинони вазирони маориф ва меҳнати Осиёи Марказӣ

• Аскар Сактагaнович Бияхметов, Муовини вазири меҳнат ва ҳифзи иҷтимоии Ҷумҳурии Қазоқистон
• Альберт Дамирбекович Махметкулов, Муовини вазири маориф ва илми Ҷумҳурии Қирғизистон
• Халбиби Тачжанова, Муовини вазири меҳнат ва ҳифзи иҷтимоии аҳолии Туркманистон
• Азат Атаев, Муовини вазири маорифи Туркманистон
• Алишер Акмалович Муратов, Муовини вазири шуғл ва коҳиши камбизоатии Ҷумҳурии Ӯзбекистон
• Бахтиёр Юлдашев, Директори Агентии миллии таъмини сифати таълим дар назди Маъмурияти Президенти Ҷумҳурии Ӯзбекистон

10:40 – 10:55 | Сурати оилавӣ
 

Муҳокимаҳо дар нимаи аввали рӯз дар доираи ҷаласаҳои корӣ оид ба ҳамкории соҳавӣ ва шарикӣ барои рушди малакаҳо идома хоҳанд ёфт.

Аз дурнамои ҷаҳонӣ то амали маҳаллӣ

Ниммаи аввали рӯз - боздидҳои омӯзишӣ ба маконҳои "APRO Formazione" ва корхонаи "Ferrero" дар шаҳри Алба, ду мисоли пешбари он, ки чӣ гуна шарикӣ байни муассисаҳои таълимӣ, корхонаҳо ва ҷомеаҳои маҳаллӣ метавонад навоварӣ, таҷрибаҳои пешқадам ва имкониятҳои шуғлро ташкил намояд.

Рӯзи ҷумъа, 31 октябр, рӯзи дуюми чорабинӣ ба ҷаласаҳо оид ба сиёсати шуғли ҷавонон ба далелҳо асосёфта, ҳамкории минтақавӣ оид ба малакаҳо, усулҳои инноватсионии таълим ва омӯзиш ва таҳияи харитаи роҳи малакаҳо барои Осиёи Марказӣ бахшида мешавад. Ҷаласа бо қабули паёмҳои муштараки сиёсӣ ва ӯҳдадориҳо барои амиқтар гардонидани ҳамкории минтақавӣ дар доираи лоиҳаи «DARYA» ба анҷом мерасад.