Ýewropa Bileleşiginiň Türkmenistandaky wekiliýeti Adam Hukuklary Gününe bagyşlanan Jemgyýetçilik Forum Debatlaryny geçirdi
18-nji dekabrda, her ýyl 10-njy dekabrda halkara derejesinde bellenilýän Adam Hukuklary Güniniň çäginde, Ýewropa Bileleşiginiň Türkmenistandaky wekiliýeti Türkmenistanyň Döwlet, Hukuk we Demokratiýa instituty hem-de Türkmenistanyň Ombudsmeniniň edarasy bilen hyzmatdaşlykda adam hukuklarynyň gymmatlyklaryny wagyz etmäge gönükdirilen Jemgyýetçilik Forum Debatlaryny gurnady. Çäre esasy adam hukuklary meseleleri boýunça açyk we konstruktiw pikir alyşmaga gatnaşmak üçin uniwersitet talyplaryny, şeýle hem milli we halkara edaralaryň wekillerini bir ýere jemledi.
Debatlara üç ýokary okuw mekdebiniň — Türkmenistanyň Daşary işler ministrliginiň Halkara gatnaşyklary institutynyň, Halkara ynsanperwer ylymlary we ösüş uniwersitetiniň hem-de Magtymguly adyndaky Türkmen döwlet uniwersitetiniň talyplary gatnaşdylar. Jemgyýetçilik Forum Debatlary formaty boýunça gatnaşyjylar üç tapgyrda jemgyýet üçin möhüm bolan mowzuklar boýunça “tarapdar” we “garşy” ýagdaýlardan çykyş etdiler. Debatlaryň mowzuklaryna emeli aň we adam hukuklarynyň goralmagy, howanyň üýtgemegi — XXI asyryň iň uly adam hukuklary meselesi hökmünde, şeýle hem bilimde inklýuziwlik ýaly mowzuklar girdi.
Debatlar ýaşlaryň arasynda tankydy pikirlenmäni, ynandyryjy çykyş etmek we logiki esaslandyrmak başarnyklaryny ösdürmäge, şeýle hem özara sylagly pikir alyşma we raýat işjeňligi medeniýetini ilerletmäge gönükdirildi. Ýewropa Bileleşiginiň Türkmenistandaky wekiliýetiniň, milli edaralaryň we halkara guramalaryň wekillerinden düzülen eminler toparlary toparlaryň çykyşlaryny delillendirişiň hili, ritorika, toparlaýyn iş, hem-de debat medeniýeti boýunça bahalandyrdy.
Adam Hukuklary Günini bellemek bilen baglylykda geçirilen bu debatlar ýaşlara häzirki zaman adam hukuklary meseleleri barada oýlanmak we bu hukuklaryň häzirki döwürde nähili goralyp we ilerledilip bilinjekdigi barada dialoga işjeň gatnaşmak üçin möhüm platforma bolup hyzmat etdi.
Şeýle başlangyçlaryň üsti bilen Ýewropa Bileleşigi bilim ulgamyny, ýaşlaryň gatnaşygyny we açyk dialogy Türkmenistanda adam hukuklaryny ilerletmegiň möhüm sütünleri hökmünde goldamagyny dowam etdirýär.