2021 yilda 16 nafar o'zbekistonlik talabalar Yevropa universitetlarida magistr darajasini olish uchun Erasmus+ stipendiyalarini qo'lga kiritdilar
Toshkent, 9 iyul - Bugun O'zbekistondagi 16ta yangi ERASMUS + stipendiyasi egalari uchun O'zbekistondagi Milliy Erasmus Ofisi va Yevropa Ittifoqining O'zbekistondagi Delegatsiyasi tomonidan tanishuv uchrashuvi tashkil etildi. O'zbekistondan 7 qiz va 9 o'g'il Erasmus Mundus stipendiyasini qo'lga kiritib, Germaniya, Frantsiya, Italiya, Estoniya, Vengriya, Buyuk Britaniya, Belgiya, Ispaniya, Finlyandiya, Gollandiya, Avstriya va Rossiya Federatsiyasi singari Yevropa davlatlarida o’qishga borishadi. Ta'limning asosiy yo'nalishlari - tibbiyot, qishloq xo'jaligi, muhandislik, siyosat va xalqaro huquqdan iboratdir.
Tadbirning ochilish nutqida Yevropa Ittifoqining O'zbekistondagi elchisi Sharlott Adrian xonim ta'kidlaganidek: “Umuman olganda, so'nggi besh yil ichida 72 nafar O'zbekiston yoshlari Erasmus Mundus stipendiyalariga ega bo'ldilar. Chet elda o'qish global iqtisodiyotda muvaffaqiyat kaliti bo'lib qolmoqda. O'zbekiston va Yevropa Ittifoqi sizlardek sayohat qiladigan, dunyoni kashf etadigan va hamkorligimizni rivojlantiradigan yosh, yorqin, o'qimishli va fidoyi odamlarga umid bog’lamoqda".
Tadbir davomida ishtirokchilar Erasmus+ning boshqa dasturlari va afzalliklari bilan tanishdilar, tarmoq resurslari, tadqiqotlar va moliyalashtirish imkoniyatlari haqida ma’lumotga ega bo’ldilar, hamda dastur bitiruvchilarining maslahatlarini tingladilar, shuningdek, ko'p madaniyatli dunyoda aloqa qilish bo'yicha treningdan o'tdilar.
2021 yilgi Erasmus + xalqaro tanlovining jami 2.756 nafar g'oliblari Yevropa Ittifoqi va butun dunyo universitetlarida qo'shma magistrlik dasturlarida tahsil olishadi. Dunyoning 167 mamlakatidan raqobatlashayotgan 12.271 yoshlar orasida O'zbekistondan 90ta ariza yuborildi.
Shuni ham ta'kidlash joizki, 2021-2027 yillarda yangi ERASMUS dasturi uchun byudjet 26,2 milliard yevroni tashkil qilgan bo'lsa, 2014-2020 yillarda bu ko'rsatkich 14,7 milliard yevroni tashkil etadi. Ushbu sezilarli darajada ko'paygan byudjet bilan Erasmus + dasturi yanada inklyuziv, raqamli va yashil bo'ladi!
Qo'shimcha ma'lumot:
Erasmus + - bu Yevropa Ittifoqining dasturi bo'lib, u Yevropada va undan tashqarida ta'lim olish, yoshlar va sport sohalarida odamlarning ta'lim, kasbiy va shaxsiy rivojlanishini qo'llab-quvvatlashga qaratilgan. Dastur mobillik, loyihalar va sheriklik, siyosatni ishlab chiqish va hamkorlik qilish uchun o'quv asoslarini taqdim etadi. Dastur barcha yoshdagi va turli xil kishilar uchun mo'ljallangan va har xil turdagi tashkilotlar uchun ochiq.
Erasmus Mundus qo'shma magistrlik dasturlari - bu o'quv dasturini, sayohat xarajatlarini, sug'urta, vizani qo'llab-quvvatlash, oyiga 1000 yevro miqdorida stipendiya va boshqalarni to'liq qoplaydigan grantlarni taqdim etadigan kamida ikkita Yevropa universitetlari konsortsiumi tomonidan ishlab chiqilgan noyob magistrlik kurslaridir. Dastur doirasida yoshlar til kurslariga yozilishadi, o'zlarining mezbon davlatlari bilan tanishadilar, yangi madaniyatni kashf etadilar va butun dunyodagi talabalar bilan birgalikda bundan zavqlanishadi.
Erasmus + dasturi haqida ko'proq ma'lumot olish uchun O'zbekistondagi Erasmus Milliy Ofisi (www.erasmusplus.uz) va Facebookdagi Erasmus Student Network (Facebook) sahifasiga (https://www.facebook.com/groups/741600542700174) tashrif buyuring, Telegram t .me/erasmus_uzb ga obuna bo'ling.
