Yevropa Ittifoqi Delegatsiyasi “Mr. Nobody Against Putin” filmi namoyishini o‘tkazdi
2026 yil 4 iyun – Yevropa Ittifoqining O‘zbekistondagi Delegatsiyasi Elchi qarorgohida “Mr. Nobody Against Putin” hujjatli filmining maxsus namoyishini tashkil etdi. Tadbir diplomatik korpus vakillari, fuqarolik jamiyati tashkilotlari, jurnalistlar va boshqa hamkorlarni urush, propaganda va fuqarolik jasoratining ta’siri haqida fikr almashish uchun bir joyga jamladi.
Rejissyor Devid Borenstayn va Pavel Talankin bilan birgalikda suratga olingan “Mr. Nobody Against Putin” filmi Rossiyaning Ukrainaga qarshi keng ko‘lamli bosqini boshlanganidan so‘ng hayoti tubdan o‘zgargan rossiyalik boshlang‘ich sinf o‘qituvchisi Pavel “Pasha” Talankin haqidagi hikoyani so‘zlab beradi. O‘quvchilari orasida mehribon ustoz va ishonchli maslahatchi sifatida tanilgan Talankin asta-sekin davlat targ‘iboti va militarizatsiya ta’siridagi tizimning bir qismiga aylanib qoladi.
Maktab videografi sifatida Talankin o‘z maktabi va mahalliy hamjamiyatidagi o‘zgarishlarni hujjatlashtiradi. Uning kamyob va ta’sirchan tasvirlari propaganda ta’sirining kuchayishi, yoshlar militarizatsiyasi hamda urushning Rossiyadagi kundalik hayotga ta’sirini yoritib beradi. Jiddiy axloqiy tanlovlar va shaxsiy xavfsizligiga tahdidlar qarshisida u oxir-oqibat xalqaro miqyosdagi fosh qiluvchiga aylanadi.
Tadbirni ochib berar ekan, Yevropa Ittifoqining O‘zbekistondagi Elchisi Toyvo Klaar shunday dedi: “Bu film bizga umid uchqunini ham beradi. U shuni ko‘rsatadiki, yolg‘on va adolatsizlik qarshisida har birimiz to‘g‘ri yo‘lni tanlash imkoniyatiga egamiz va hatto kichikdek tuyulgan harakatlar ham qo‘rquv va yolg‘on asosiga qurilgan tizimlarga qarshi turish qudratiga ega.”
Samimiy hikoya va ilgari kuzatilmagan darajadagi ochiq tasvirlar orqali hujjatli film avtoritarizmning insonlarga ta’siri hamda sukut o‘rniga haqiqatni tanlagan insonlar duch keladigan bosimlarni kuchli tarzda namoyon etadi. Film mustaqil fikrlar, so‘z erkinligi va aks holda yashirin qolishi mumkin bo‘lgan voqeliklarni hujjatlashtirishda jasoratli insonlarning o‘rnini alohida ta’kidlaydi.
Namoyishdan so‘ng ishtirokchilar filmda ko‘tarilgan mavzular yuzasidan ochiq muloqot o‘tkazdilar. Muhokamalar asosiy erkinliklarni himoya qilish, media savodxonlik, mustaqil jurnalistika va fuqarolik jamiyatini qo‘llab-quvvatlashning ahamiyatiga bag‘ishlandi.
Ushbu namoyish Yevropa Ittifoqining inson huquqlari, demokratik qadriyatlar va so‘z erkinligi bilan bog‘liq masalalar bo‘yicha tinchlik, muloqot, tanqidiy fikrlash va jamoatchilik ishtirokini rag‘batlantirishga qaratilgan sa’y-harakatlarining bir qismi bo‘ldi.
Yevropa Ittifoqi mustaqil ommaviy axborot vositalari, fuqarolik jamiyati tashkilotlari hamda jamoatchilikning xabardor munozarasini rivojlantirish va jamiyatning dezinformatsiya hamda manipulyatsiyalarga qarshi barqarorligini mustahkamlashga xizmat qiluvchi tashabbuslarni qo‘llab-quvvatlashga sodiq qoladi.