Yevropa Ittifoqi O‘zbekiston davlat xizmatchilarining transchegaraviy jinoyatlarni tergov qilish salohiyatini mustahkamlashga hissa qo‘shmoqda
14 aprel 2023 yil, Toshkent, O‘zbekiston. 12-14 aprel kunlari Markaziy Osiyoda chegaralarni boshqarishga ko‘maklashish dasturi (BOMKA 10) Toshkent shahrida transchegaraviy jinoyatlar, xususan, giyohvandlik moddalari va ularning prekursorlari kontrabandasi bo‘yicha tergovchilar uchun seminar o‘tkazdi. Mazkur tadbir giyohvandlik vositalari va ularning prekursorlari kontrabandasiga qarshi kurashish sohasidagi xodimlarning salohiyati va imkoniyatlarini oshirishga xizmat qildi.
Seminar davomida Litva Hukumati huzuridagi Bojxona jinoiy xizmati hamda Narkotik moddalar, tamaki va alkogolizmni nazorat qilish departamentining Prekursor nazorati va xavf-xatarni baholash bo‘limining ekspertlar guruhi ishtirokchilarni Yevropa Ittifoqining giyohvandlik moddalariga qarshi kurash choralari, ularning kontrabandasi va prekursorlari bilan bog‘liq uyushgan transchegaraviy jinoyatlarni tergov qilish usullari bilan tanishtirdi.
Seminarda giyohvandlik moddalarining noqonuniy aylanishining asosiy tendensiyalari, giyohvandlik vositalari va prekursorlarni nazorat qilishning qonunchilik modellari, turli vositalar va maxsus tergov usullari, shuningdek, giyohvandlik moddalari kontrabandasi va ularni noqonuniy ishlab chiqarishda foydalanish bilan bog‘liq amaliy tadqiqotlar ko‘rib chiqildi. Ushbu faoliyat natijasida giyohvandlik vositalari va prekursorlarning kontrabandasini tekshirishning standart operasion tartiblari ishlab chiqiladi.
BOMKA haqida
Markaziy Osiyoda chegaralarni boshqarishga koʼmaklashish dasturi (BOMKА) Yevropa Ittifoqining Hamkorlar konsortsiumi hamda Migratsiya siyosatini rivojlantirish markazi tomonidan amalga oshiriladi. Hamkorlar konsortsiumi Latviya Respublikasi Davlat chegarasini qoʼriqlash xizmati tomonidan boshqariladi. BOMKА 10-bosqichining umumiy byudjeti 21,65 million yevroni tashkil etib, u mintaqadagi eng yirik tashabbuslardan biri hisoblanadi. 2021 yilning aprel oyida boshlangan BOMKА dasturini amalga joriy etish muddati 54 oydan iborat.
BOMKАning asosiy maqsadi chegaralarni integratsiyalashgan boshqaruvi asosida mintaqada barqaror iqtisodiy rivojlanishga koʼmaklashish orqali mintaqada xavfsizlik va barqarorlikni taʼminlashdir. BOMKАning oʼninchi bosqichi mavzuviy jihatdan toʼrt komponentni qamrab olgan: chegara idoralarini institutsional rivojlantirish, qonun buzilishi hollarini aniqlash boʼyicha salohiyatni oshirish, savdoni osonlashtirish hamda transchegaraviy hamkorlikni takomillashtirishga koʼmak berish. Geografik jihatdan loyiha Markaziy Osiyoning barcha besh davlatini qamrab oladi.