Yevropa Ittifoqi va BMT Taraqqiyot Dasturining to‘rt yillik loyihasi Surxondaryoda Afg‘oniston fuqarolari uchun kengroq imkoniyatlar merosini qoldirdi
2026-yil 25-iyun — Bugun Yevropa Ittifoqining Oʻzbekistondagi Delegatsiyasi, Birlashgan Millatlar Tashkilotining Taraqqiyot Dasturi (UNDP) va Oʻzbekiston Respublikasi Oliy taʼlim, fan va innovatsiyalar vazirligi (OTFIV) “Afgʻoniston fuqarolarini oʻqitish va kasbiy tayyorlash boʻyicha Surxondaryo viloyatining salohiyatini oshirish” loyihasi muvaffaqiyatli yakunlanganini eʼlon qildi. Ushbu muhim voqea Termiz tumanidagi Afgʻoniston fuqarolarini oʻqitish taʼlim markazida boʻlib oʻtgan joʻshqin Kasb festivali va loyihani yopilish marosimida nishonlandi.
Yevropa Ittifoqining Oʻzbekiston Respublikasidagi elchisi, Janobi Oliylari Toyvo Klaar shunday dedi: “Yevropa Ittifoqi insonlarga sarmoya kiritish va inson salohiyatini roʻyobga chiqarish tarafdoridir. Ushbu tashabbus Yevropa Ittifoqi va Oʻzbekiston oʻrtasidagi hamkorlikning mustahkamligi hamda farovon va oʻzaro bogʻliq mintaqani yaratish borasidagi umumiy qarashlarimizning yaqqol dalilidir. Bugun biz Termizda nishonlayotgan haqiqiy meros nafaqat biz qoldirayotgan ajoyib infratuzilma, balki hamkorlikning mustahkam ruhi va bu iqtidorli bitiruvchilar oʻzlari va kengroq jamoalari uchun bunyod etadigan porloq iqtisodiy kelajakdir.”
Loyiha yutuqlari keng qamrovli imkoniyatlarni kengaytirish va integratsiya merosini namoyon etmoqda. 700 dan ortiq talaba IT, turizm va agrobiznes kabi yuqori talabga ega sohalarda bakalavriat dasturlari va ixtisoslashtirilgan texnik treninglardan foydalanish imkoniyatiga ega boʻldi. Muhimi, tashabbus keng qamrovli mini-grantlar dasturi orqali mahalliy iqtisodiyotga yangi kuch bagʻishladi, bitiruvchilarga oʻz bizneslarini boshlash va kengaytirish uchun zarur boʻlgan boshlangʻich kapital va uskunalar bilan taʼminlandi. Bu yangi tadbirkorlar hozirda ish oʻrinlari yaratib, qimmatli xizmatlar koʻrsatmoqda va afgʻon bitiruvchilariga ham, ularni qabul qiluvchi Surxondaryodagi mahalliy jamoalarga ham foyda keltiradigan umumiy iqtisodiy rivojlanishga hissa qoʻshmoqda.
Oʻzbekiston Respublikasi Prezidentining Afgʻoniston boʻyicha Maxsus vakili, janob Ismatulla Ergashev ochilish nutqlarida taʼkidladi: “Oʻzbekiston doimo yaxshi qoʻshnichilik va konstruktiv hamkorlik siyosatini qoʻllab-quvvatlab kelgan. Ushbu hamkorlikdagi loyiha mamlakatimizning mintaqaviy farovonlikka sodiqligining yorqin namunasidir. Yevropa Ittifoqi va BMT bilan hamkorlikda biz oʻzaro hurmat, taʼlim va umumiy iqtisodiy imkoniyatlar barqaror va rivojlanayotgan Markaziy Osiyo uchun poydevor yaratadigan muhitni yaratdik.”
“So‘nggi to‘rt yil davomida Afg‘oniston fuqarolarini o‘qitish ta’lim markazi zamonaviy ta’lim va innovatsiyalar maskaniga aylandi. Ilg‘or o‘quv dasturlari va raqamli platformalarni joriy etish orqali ushbu loyiha nafaqat yuzlab tinglovchilarga zamonaviy kasbiy ko‘nikmalarni egallash imkonini berdi, balki Surxondaryo viloyatining ta’lim salohiyatini ham sezilarli darajada mustahkamlab, inklyuziv ta’limning barqaror va sifatli modelini yaratishga xizmat qildi,” deb ta’kidladi O‘zbekiston Respublikasi Oliy ta’lim, fan va innovatsiyalar vazirining o‘rinbosari Uktam Salomov.
Ushbu saʼy-harakatlarning yakuni Kasb festivalida yaqqol namoyon boʻldi. U iqtidorli bitiruvchilar va mahalliy ish beruvchilar oʻrtasida koʻprik vazifasini oʻtab, kuchli madaniyatlararo professional aloqalarni yoʻlga qoʻydi. Bundan tashqari, loyiha zamonaviy Raqamli taʼlim platformasi, zamonaviy IT markazi va toʻliq jihozlangan YI Bilimlar markazi kabi eng zamonaviy aktivlarni ushbu markazga rasman topshirish orqali mintaqaning taʼlim infratuzilmasini doimiy ravishda yuksaltirib, barqaror institutsional oʻsishni taʼminladi.
Surxondaryo viloyati hokimi oʻrinbosari, janob Oybek Ashurov shunday dedi: “Surxondaryo mintaqaviy hamkorlik, savdo va sarmoya uchun darvoza sifatidagi rolini muntazam ravishda mustahkamlab bormoqda. Ushbu loyiha kabi tashabbuslar taʼlim va kasbiy malaka oshirish mahalliy iqtisodiy oʻsishga qanday hissa qoʻshishi va viloyatimizda istiqomat qilayotgan afgʻon fuqarolari hamda mezbon jamoalar uchun yangi imkoniyatlar yaratishi mumkinligini koʻrsatmoqda. Biz Yevropa Ittifoqi va UNDP bilan hamkorlikni yuqori qadrlaymiz va barqaror mintaqaviy rivojlanishga koʻmaklashuvchi tashabbuslarni qoʻllab-quvvatlashga sodiq qolamiz.”
BMT Taraqqiyot dasturi (UNDP)ning Oʻzbekistondagi doimiy vakilasi Akiko Fujii xonim taʼkidladi: “Ushbu loyihaning eng muhim va uzoq muddatli natijasi — insonlarga o‘z kelajagini o‘z qo‘llari bilan barpo etish imkonini berganidadir. Ta’lim, kasbiy ko‘nikmalar va tadbirkorlikni qo‘llab-quvvatlash imkoniyatlarini kengaytirish orqali biz Afg‘oniston fuqarolariga, ayniqsa ayollariga, o‘z turmush darajasini mustahkamlash hamda Surxondaryo viloyatining iqtisodiy rivojlanishiga munosib hissa qo‘shish uchun zarur bilim va ko‘nikmalarni berdik.”
Loyiha rasman yakunlanar ekan, uning yutuqlari mintaqada inklyuziv, jamoatchilikka asoslangan rivojlanish uchun mustahkam namuna yaratmoqda. Yevropa Ittifoqi va BMT Taraqqiyot dasturi Oʻzbekiston hukumati bilan mustahkam hamkorligini yana bir bor tasdiqlaydi. Ular joʻshqin iqtisodiyotni rivojlantirish, inson salohiyatini qoʻllab-quvvatlash va Surxondaryo hamda undan tashqarida oʻzaro farovonlik merosining davom etishini taʼminlashdek umumiy maqsad yoʻlida birlashgan.
Maʼlumot uchun
Yevropa Ittifoqi tomonidan moliyalashtirilgan, umumiy budjeti 2 million yevro boʻlgan “Afgʻoniston fuqarolarini oʻqitish va kasbiy tayyorlash boʻyicha Surxondaryo viloyatining salohiyatini oshirish” loyihasi UNDP tomonidan OTFIV va Afgʻoniston fuqarolarini oʻqitish taʼlim markazi bilan yaqin hamkorlikda amalga oshirilmoqda. Ushbu istiqbolli tashabbus 2022-yilda yangi imkoniyatlarni ochish maqsadida boshlangan. Oʻtgan toʻrt yil davomida loyiha inson kapitalini rivojlantirish uchun katalizator boʻlib xizmat qildi, oliy taʼlim, ilgʻor kasb-hunar taʼlimi va mustahkam tadbirkorlikni qoʻllab-quvvatlashni taklif qildi. U mintaqada istiqomat qilayotgan Afgʻon fuqarolarining imkoniyatlarini muvaffaqiyatli kengaytirdi, shu bilan birga Surxondaryoning mahalliy iqtisodiy va ijtimoiy manzarasini boyitdi.