Yevropa tillari kuni 2026 Toshkentda til va madaniy xilma-xillikni nishonladi
2026 yil 30 sentabr kuni Toshkent shahrida Yevropa tillari kuni doirasida Yevropaning til va madaniy xilma-xilligini nishonlashga bag‘ishlangan bir kunlik tadbirlar dasturi bo‘lib o‘tdi va u 500 nafardan ortiq til ixlosmandlarini birlashtirdi. Tadbir, shuningdek, ko‘p tillilikning insonlar o‘rtasidagi aloqalarni mustahkamlash hamda Yevropa va O‘zbekiston o‘rtasida ta’lim va madaniy almashinuv uchun yangi imkoniyatlar yaratishdagi ahamiyatini namoyon etdi.
EU IN UZBEKISTAN
Kunduzgi dastur O‘zbekiston davlat jahon tillari universitetida bo‘lib o‘tdi. Unda notiqlar o‘z ona tillarida qiziqarli mashg‘ulotlar orqali ishtirokchilarni turli Yevropa tillari bilan tanishtirdilar. Taqdimotlar bilan bir qatorda, “Tillar yarmarkasi” doirasida mamlakatlar stendlari tashkil etilib, ularda o‘yinlar, viktorinalar, madaniyatga oid ma’lumotlar hamda talabalar uchun turli tillar va madaniyatlar bilan bevosita tanishish imkoniyatlari taqdim etildi. Gretsiya Elchisi Janobi Oliyalari Paraskevi Tzeveleki va Italiya Elchisi Janobi Oliylari Guido De Sanctis ochilish marosimida, shuningdek, Chexiya, Estoniya, Fransiya, Germaniya, Gretsiya, Vengriya, Italiya, Niderlandiya, Polsha, Ruminiya, Ispaniya va Shveytsariya elchixonalari, shuningdek Britaniya Kengashi, Gyote-Instituti va Alliance Française vakillari bilan birgalikda ishtirok etdilar.
O‘zbekiston davlat jahon tillari universitetining Ilmiy ishlar va innovatsiyalar prorektori Otabek Yusupov ta’kidlaganidek, tillarni o‘rganish nafaqat zamonaviy ta’limning muhim qismi, balki xalqaro muloqot, madaniy almashinuv va hamkorlikning samarali vositasidir.
Tadbir, shuningdek, til o‘rganish, ta’lim va xalqaro almashinuv o‘rtasidagi aloqalarni mustahkamlash uchun imkoniyat yaratdi. Ayniqsa, talabalar va yoshlar uchun xorijiy tillarni bilish akademik mobillik, kelajakdagi ish imkoniyatlari hamda turli madaniy muhit vakillari bilan yanada mustahkam aloqalar o‘rnatishga xizmat qilishi mumkin.
Bayram tadbirlari kechqurun Gyote-Institutda bo‘lib o‘tgan “Speakeasy Night” dasturi bilan davom etdi. Kechki dastur muloqot, madaniy almashinuvni davom ettirish uchun imkoniyat yaratdi. Ishtirokchilar Yevropa va o‘zbekistonlik qisqa metrajli filmlarining namoyishi va muhokamasida qatnashish yoki qiziqarli ravishda til o‘rganish mashg‘ulotlari va tezkor netvorking sessiyalarida ishtirok etish imkoniyatiga ega bo‘ldilar. Tadbirlar ishtirokchilarni turli ifoda, iboralar va madaniy faktlar bilan tanishishga, shuningdek, boshqa til o‘rganuvchilar va til ixlosmandlari bilan muloqot qilishga undadi.
“Tillar Yevropaning madaniy o‘ziga xosligining ajralmas qismi va insonlarni bir-biriga bog‘lovchi muhim ko‘prikdir. Yevropaning kuchi uning xilma-xilligidadir, bir-birimizning tillarimizni o‘rganish esa ushbu xilma-xillikni yanada chuqurroq o‘zaro anglash, muloqot va hamkorlikka aylantirishga yordam beradi. Ishonchim komilki, tillarni o‘rganish Yevropa Ittifoqi va O‘zbekiston o‘rtasidagi o‘zaro bog‘liqlikni mustahkamlovchi muhim omildir”, — dedi Yevropa Ittifoqining O‘zbekistondagi Delegatsiyasi rahbari o‘rinbosari Renata Vrubel xonim.
EU IN UZBEKISTAN
Til, madaniyat, ta’lim va norasmiy ijtimoiy muloqotni birlashtirgan Toshkentdagi Yevropa tillari kuni ishtirokchilarga Yevropaning til xilma-xilligini kashf etishning amaliy va qiziqarli usulini taklif etdi. Kechki tadbir muhitini his qilish uchun xilma-xillikdagi birdamlikni tarannum etuvchi Yevropa musiqalarini tinglang [Spotify pleylistiga havola].
EU IN UZBEKISTAN
Yevropa tillari kuni har yili 26 sentabrda til o‘rganish, ko‘p tillilik va madaniyatlararo o‘zaro tushunishni targ‘ib qilish maqsadida nishonlanadi. Toshkentdagi dastur ham ishtirokchilarni yangi tillarni kashf etishga, turli madaniyatlar bilan yaqindan tanishishga va birgalikdagi tajribalar orqali aloqalar o‘rnatishga undab, ushbu tamoyillarni o‘zida aks ettirdi.