Сёння мы адзначаем Міжнародны дзень салідарнасці з Беларуссю, у памяць аб 31-гадовым Рамане Бандарэнку, які быў жорстка збіты сілавікамі рэжыму, што прывяло да яго трагічнай смерці 12 лістапада 2020 года. Гэта смерць так і не была расследавана, і ніякіх абвінавачанняў вінаватым у ёй прад'яўлена не было.

Пасля фальсіфікаваных прэзідэнцкіх выбараў 2020 года сітуацыя з правамі чалавека ў Беларусі працягвае кардынальна пагаршацца. Рэжым ажыццявіў больш за 40 000 палітычна матываваных затрыманняў, узбудзіў не менш за 12 000 палітычна матываваных крымінальных спраў і ўтрымлівае амаль 1 500 палітычных зняволеных.

Прыкметна распаўсюдзілася практыка ўтрымання пад вартай у поўнай ізаляцыі ад знешняга свету, накіраваная супраць прадстаўнікоў палітычнай апазіцыі, актывістаў грамадзянскай супольнасці, праваабаронцаў і журналістаў, якія зараз знаходзяцца за кратамі. Чыстка палітычных партый і дзяржаўная палітыка далейшага абмежавання грамадзянскай прасторы ў Беларусі таксама ўзмацніліся.

Еўрапейскі саюз падтрымлівае намаганні беларускага дэмакратычнага руху і высока ацэньвае мужнасць і стойкасць беларускага народа, які працягвае адстойваць дэмакратыю і свае фундаментальныя правы і свабоды, нягледзячы на жорсткі ўціск.

Мы таксама аддаем належнае ўсім палітычным зняволеным, у тым ліку тым, якія загінулі ад рук рэжыму ў выніку неналежнага абыходжання, жорсткасці і адмовы ў медыцынскай дапамозе, сярод якіх Вітольд Ашурак, Дзмітрый Дудойць, Аляксандр Віхор, Мікалай Клімовіч, Дзмітрый Сарокін і Алесь Пушкін. ЕС паўтарае сваё патрабаванне неадкладнага і безумоўнага вызвалення ўсіх палітычных вязняў у Беларусі.

Еўрапейскі саюз разам са сваімі міжнароднымі партнёрамі знаходзіцца ў авангардзе дзеянняў па забеспячэнні падсправаздачнасці ў рамках Арганізацыі Аб'яднаных Нацый і Міжнароднай платформы па прыцягненні да адказнасці для Беларусі – незалежнай і бесстаронняй платформы для збору, праверкі і захавання дакументацыі і доказаў сур'ёзных парушэнняў правоў чалавека, учыненых у Беларусі падчас і пасля прэзідэнцкіх выбараў у жніўні 2020 года. ЕС падтрымлівае Платформу палітычна і фінансава.

ЕС будзе падтрымліваць беларускі народ столькі, колькі трэба на яго на шляху да незалежнай, дэмакратычнай і квітнеючай краіны, якая з'яўлялася б часткай мірнай Еўропы.