Беларусь: заява Высокага прадстаўніка Жазэпа Барэля і Камісара Адыны Валеан наконт прымусовай пасадкі самалёта Ryanair

На гэтым тыдні Савет ІКАО прыйшоў да высновы, што ўрад Беларусі здзейсніў акт незаконнага ўмяшання, які з'яўляецца парушэннем міжнароднага авіяцыйнага права, прымусіўшы да пасадкі самалёт Ryanair, які выконваў рэйс FR4978, у Мінску 23 мая 2021 года.

Асуджэнне гэтага акту было заснавана на падрабязнай і грунтоўнай справаздачы па ўстанаўленні фактаў, падрыхтаванай Сакратарыятам ІКАO, якая ўключала інтэрв'ю і аўдыёзапісы мінскага авіядыспетчара, які ўдзельнічаў у інцыдэнце. У справаздачы пацвярджаецца, што пагроза выбуху бомбы ў дачыненні да рэйса Ryanair FR4978 была загадзя ілжывай, што да гэтага маюць дачыненне высокапастаўленыя чыноўнікі Беларусі, якія далі ўказанні па прымусовай пасадцы ў Мінску, і што інцыдэнт паставіў пад пагрозу бяспеку рэйса і яго пасажыраў.

Такім чынам, справаздача пацвярджае тое, што ўжо было ўстаноўлена ЕС, а менавіта, што беларускі рэжым арганізаваў угон грамадзянскага самалёта з адзінай мэтай – затрымаць апазіцыйнага журналіста Рамана Пратасевіча і яго сяброўку Соф'ю Сапегу, што з'яўляецца парушэннем міжнароднага паветранага права, а таксама пагрозай бяспецы міжнароднай грамадзянскай авіяцыі.

4 чэрвеня 2021 года ЕС і яго дзяржавы-члены разам з іншымі міжнароднымі партнёрамі прынялі меры ў адказ на гэты сур'ёзны і безадказны ўчынак, пазбавіўшы беларускіх перавозчыкаў доступу ў еўрапейскую паветраную прастору і аэрапорты. 21 чэрвеня 2021 года ЕС увёў санкцыі супраць фізічных і юрыдычных асоб, датычных да ўгону самалёта Ryanair. У сувязі з гэтым 24 чэрвеня 2021 г. таксама быў прыняты істотны пакет галіновых мер.

ЕС вітае той факт, што справаздача будзе перададзена ўсім дзяржавам-членам ІКАО і што пра парушэнні Чыкагскай канвенцыі Беларуссю будзе паведамлена Асамблеі ІКАО на яе маючай адбыцца 41-й сесіі (27 верасня - 7 кастрычніка 2022 г.). Справаздача будзе таксама накіравана Генеральнаму сакратару Арганізацыі Аб'яднаных Нацый для прыняцця адпаведных далейшых мер.

Тым часам ЕС працягвае свае рашучыя дзеянні па падтрымцы дэмакратыі, правоў чалавека і фундаментальных свабод і павялічвае дапамогу беларускаму народу і грамадзянскай супольнасці. Мы таксама асуджаем тое, што рэжым захоўвае сваю абуральную непавагу да правоў чалавека і фундаментальных свабод беларускага народа. Рэпрэсіі, якія працягваюцца, павінны быць спынены, а ўсе палітычныя зняволеныя павінны быць неадкладна і безумоўна вызвалены.