Беларусь: Шостая сустрэча Кансультатыўнай групы з дэмакратычнымі сіламі і грамадзянскай супольнасцю адбылася ў Бруселі

Шостага сакавіка ў Бруселі адбылася шостая сустрэча Кансультатыўнай групы Еўрапейскага саюза з дэмакратычнымі сіламі ды арганізацыямі грамадзянскай супольнасці Беларусі. ЕС пацвердзіў сваю рашучую падтрымку народа Беларусі ды яго імкненняў да дэмакратычнай, незалежнай і суверэннай Беларусі. 

У палях сустрэчы Кансультатыўнай групы Высокі прадстаўнік/віцэ-прэзідэнт Кая Калас і камісар Марта Кос сустрэліся з лідарам дэмакратычных сіл Беларусі Святланай Ціханоўскай, Паўлам Латушкам, Віктарам Бабарыкам і Марыяй Калеснікавай. Яны пацвердзілі нязменную падтрымку Еўрапейскім саюзам дэмакратычнай будучыні Беларусі. 

Падчас сустрэчы ўдзельнікі абмеркавалі нядаўнія падзеі ў Беларусі, у тым ліку яе супрацоўніцтва з Расіяй і залежнасць ад яе, а таксама ролю рэжыму ў падтрымцы агрэсіўнай вайны Расіі супраць Украіны. Яны выказваліся пра свае агульныя мэты стварэння свабоднай, дэмакратычнай, суверэннай і незалежнай Беларусі як часткі мірнай і квітнеючай Еўропы. 

ЕС пацвердзіў, што працягвае прытрымлівацца свайго падвойнага падыходу – падтрымліваць ціск на рэжым, у тым ліку праз мэтанакіраваныя абмежавальныя меры, і адначасова працягваць падтрымліваць народ Беларусі. 

Кансультатыўная група таксама разгледзела бягучую сітуацыю з правамі чалавека ў краіне, у тым ліку працяг утрымання пад вартай амаль 1150 палітычных зняволеных. Удзельнікі падкрэслілі неабходнасць іх неадкладнага і безумоўнага вызвалення, а таксама неабходнасць забеспячэння падсправаздачнасці тых, хто адказны за сістэмныя рэпрэсіі. Яны абмеркавалі нядаўняе вызваленне палітычных зняволеных і праблемы, звязаныя з іх прававым статусам і рэінтэграцыяй у грамадства. ЕС будзе працягваць аказваць ахвярам рэпрэсій, у тым ліку палітычным зняволеным ды іх сем'ям, падтрымку ў перасяленні, юрыдычную, медыцынскую і псіхалагічную падтрымку праз Механізм дапамогі ахвярам. 

Удзельнікі падвялі вынікі канкрэтных мер па садзейнічанні дэмакратычнай устойлівасці, у тым ліку ў кантэксце «Еўрапейскага шчыта дэмакратыі», а таксама праз пашыраную падтрымку грамадзянскай супольнасці, незалежных СМІ Беларусі, ініцыятыў CivicTech, мабільнасці моладзі і доступу да адукацыі ў ЕС. Пасля сфальсіфікаваных прэзідэнцкіх выбараў 2020 года ЕС мабілізаваў 200 мільёнаў еўра для падтрымкі дэмакратычных памкненняў народа Беларусі. ЕС застаецца адданы справе падтрымкі незалежных СМІ і грамадзянскай супольнасці Беларусі, а таксама справе забеспячэння справядлівасці для ахвяр рэпрэсій і прыцягнення да адказнасці вінаватых у парушэннях правоў чалавека. 

У сустрэчы прынялі ўдзел прадстаўнікі Еўрапейскай службы знешніх дзеянняў, Еўрапейскай камісіі, а таксама дэмакратычных сіл і грамадзянскай супольнасці Беларусі.