Заява Высокага прадстаўніка ЕС датычна гібрыдных дзеянняў Беларусі на знешняй мяжы ЕС

ЕС рэзка асуджае настойлівыя і правакатыўныя дзеянні Беларусі ў дачыненні да ЕС і яго дзяржаў-членаў. Такія дзеянні непрымальныя і супярэчаць папярэднім заявам Лукашэнкі аб паляпшэнні адносін з ЕС. Уварванні метэаралагічных шароў у паветраную прастору Літвы з боку Беларусі, якія парушылі сотні рэйсаў і прычынілі значныя страты літоўскім аэрапортам і тысячам падарожнікаў, нясуць рызыкі дэстабілізацыі дзяржавы ЕС і ўяўляюць сабой спробу запалохвання еўрапейскіх грамадзян праз прамую пагрозу для грамадзянскай авіяцыі. Гэтыя шары не проста інструмент кантрабанды, а частка шырокай мэтавай гібрыднай кампаніі, якая разам з іншымі дзеяннямі ўключае кантрабанду мігрантаў пры падтрымцы дзяржавы. Усе гэтыя дзеянні павінны спыніцца неадкладна. Мы заклікаем рэжым у Беларусі без далейшага прамаруджвання прыняць эфектыўныя меры па ажыццяўленні кантролю над сваёй паветранай прасторай, дзяржаўнай мяжой і тэрыторыяй, а таксама па супрацьдзеянні арганізаваным злачынным дзеянням, якія бяруць пачатак на тэрыторыі краіны, ды іх прадухіленні.

ЕС цалкам салідарны з Літвой і ўсімі дзяржавамі ЕС, якія церпяць ад гібрыдных дзеянняў Беларусі. Санкцыі супраць рэжыму ў Беларусі ўжо ўведзеныя, і ЕС гатовы надалей прымаць адпаведныя меры, калі такія дзеянні працягнуцца. Мы не дапусцім ніякіх гібрыдных кампаній, накіраваных супраць ЕС альбо яго дзяржаў-членаў.