Міжнародны дзень памяці ахвяр Халакосту: заява Высокага прадстаўніка ЕС Жазэпа Барэля
Падчас Другой сусветнай вайны чалавецтва стала сведкам жорсткага, бессэнсоўнага забойства больш за шасці мільёнаў чалавек: яўрэяў, рома, сінці і іншых людзей з-за іх паходжання альбо статусу. Пасля актаў няўяўнага жаху Халакосту было пасеяна насенне лепшай будучыні: была створана Арганізацыя Аб'яднаных Нацый, асноватворным прынцыпам якой стала выратаванне "будучых пакаленняў ад навалы вайны".
79 гадоў таму быў вызвалены лагер смерці Аўшвіц-Біркенаў.
Аднак ірацыянальная нянавісць да яўрэяў, якая прывяла да Шоа, не знікла. Мы па-ранейшаму з’яўляемся сведкамі спробаў перапісаць гісторыю, сутыкаемся з рознымі формамі адмаўлення Халакосту, трывіялізацыі і скажэнні фактаў, што таксама ўключае ў сябе яго інструменталізацыю.
Яўрэі і іншыя людзі і абшчыны па ўсім свеце працягваюць пакутаваць ад нецярпімасці, прадузятасці, гвалту і дыскрымінацыі.
Сімон Візенталь, які выжыў у Халакосце, казаў: "Вынесіце ўрокі з нашай трагедыі. Няма ніякага пісанага закону, паводле якога наступнымі ахвярамі павінны стаць яўрэі. Гэта могуць быць і іншыя людзі. Мы бачылі, як гэта пачалося ў Германіі з яўрэяў, але былі забіты людзі яшчэ больш за дваццаці нацыянальнасцяў".
Сёння, як ніколі раней, мы павінны зноў пацвердзіць, наколькі важны мір, цярпімасць і суіснаванне.
У Стратэгіі ЕС па барацьбе з антысемітызмам і садзейнічанні яўрэйскаму жыццю і ў нядаўнім сумесным звароце падкрэсліваецца: "Для нянавісці няма месца: Еўропа адзіная ў барацьбе з нянавісцю". Еўрапейскі саюз цалкам адданы барацьбе з антысемітызмам і нянавісцю ва ўсіх яе формах, адначасова заахвочваючы свабоду рэлігіі і перакананняў для ўсіх.
Адзіны спосаб прадухіліць будучыя зверствы – гэта зрабіць так, каб мінулыя злачынствы і іх ахвяры ніколі не былі забытыя. Мы вітаем заклік Генеральнай Асамблеі ААН адносна важнасці стварэння адукацыйных праграм, каб памятаць пра жахі Халакосту і прадухіліць яго паўтарэнне.
Міжнародная супольнасць павінна працаваць аб'яднана, каб словы "ніколі больш" сталі рэальнасцю паўсюль.