TSEBISO EA BAPHATLALATSI

Likhetho tsa naha ea Lesotho tsa Ntlo ea Bakhethoa li tsamaile hantle le ha ho ne ho e na le khaello ea lichelete, ho se hlake hoa molao o tsamaisang likhetho, le mabala a sa batallatsoang bakeng sa mekha le makhotla a neng a iketa.

Maseru, la 9 Mphalane – “Ho buloa hoa litsi tsa khethelo, ho khetha le ho baloa hoa sephetho li entsoe tlasa maemo a khutsitseng a nang le khotso, ‘me li entsoe ka mokhoa o nang le ponaletso”, se na se builoe ke Monghali Ignazio Corrao, Molebelli ea ka Sehlohong oa bolebelli ba likhetho ba Linaha tse Ikopantseng tsa Europe (EU EOM) naheng ea Lesotho ha a ne a fana ka polelo ea selelekela ‘mokeng oa baphatlalatsi kajeno, Maseru. “Le ha litlhophisetso li ne li sitisoa ke bohloki ba lichelete ba Komisi e Ikemetseng ea Likhetho (IEC), le ho hloka bonnete ba moralo oa molao o ts’ebetsong, Komisi e Ikemetseng ea Likhetho e phethile ts’ebetso ea eona ka lipehelo tsa nako e behiloeng, ‘me le basebetsi ba eona ba tsamaisitse letsatsi la likhetho ka nepo ba bonts’a boikitlaetso bo matla ts’ebetsong ea bona”, Monghali Corrao o ile a boela a hlakisa.

Ka letsatsi la likhetho, EU EOM e ile ea romela balebelli ba machaba ba mashome a robeli a metso e supileng (87) literekeng tse leshome ho pharalla le mabatooa a mashome a robeli (80) a Lesotho. Ka kakaretso, EU EOM e etetse le ho hlahloba litsi tsa ho khetha tse 371 ho tse 3, 149. Monghali Corrao o ile a re “re bone nako ea boiketi e nang le khotso, le ha hole joalo, lisebelisoa tsa boiketi tse sa lekaneng le khaso ea liea-le-moea e nang le ts’ekamelo li ile tsa nka karolo ho se batalleng hoa mabala pakeng tsa mekha le makhotla a lipolotiki, ‘me li ile tsa baka boima mekheng le makhotleng a manyane, ‘moho le baiketing ba ikemetseng.”

Monghali Leopoldo López Gil, eo e leng Hlooho ea Moifo oa Paramente ea Europe (European Parliament Delegation), o lebetseng likhetho e le karolo ea EU EOM, o ile a phatlalatsa, “ Ke lakatsa ho fetisa tlhompho eaka ho botsamaisi ba likhetho bo entseng sohle se matleng a bona hore bo fihlele maikarabello a bona ho sa natse khahello tsa lichelete, le ho sechaba sa Lesotho, ka ho khetholoha baemeli ba mekha le makhotla a lipolotiki ka boikitlaetso ba bona letsatsing la likhetho. Ke ts’epa hore sephetho sa likhetho se phatlalalitsoeng semolao se tla ananeloa le hore litletlebo tse ka bang teng li tla ahloloa makhotleng a molao.”

Molebelli oa Sehlooho Monghali Corrao o tsoetse pele a re “Ke lakatsa ho lebohisa litho tsa Ntlo ea Bakhethoa tsa ka moso ho khethoeng hoa tsona le ho li khothaletsa ho nts’etsa-pele ts’ebetso ea tlhopho-bocha, e le mothati o bohlokoa ntlafatsong ea puso ea sechaba ka sechaba le botsitso ka hara naha ea Lesotho le molemong oa bokamoso ba naha.”

Ka mora memo ea ‘Muso oa Lesotho, EU EOM e bile teng ka hara naha ea Lesotho ho tloha ka la 27 Phato 2022. Borumuoa bot la lebela lietsahala tsa ka morao ho likhetho ‘me bo tla ba ka hara naha hofihlela ho phetheloa ts’ebetso ea likhetho. EU EOM e tla phatlalatsa tlaleho ea eona ea ho qetela e fanang ka likhothaletso molemong oa likhetho tsa ka moso, likhoeling tse ‘maloa tse tlang.