Дыялог дазволіў ажыццявіць шырокі абмен меркаваннями пра сітуацыю з правамі чалавека як у Беларусі, так і ў Еўрапейскім саюзе, і надаць асаблівую ўвагу свабодам выказвання, сходаў і асацыяцый; выбарчым правам; смяротнаму пакаранню, рэформе пенітэнцыярнай сістэмы, антыдыскрымінацыйнай палітыцы, гендэрнай роўнасці і барацьбе супраць гвалту ў сям'і.

Дыскусіі былі ў роўнай ступені прысвечаны развіццю нацыянальных інстытутаў абароны правоў чалавека ў Беларусі, а таксама далейшаму ажыццяўленню Нацыянальнага плана дзеянняў у галіне правоў чалавека.
 
Акрамя таго, удзельнікі абмеркавалі пытанні супрацоўніцтва ў прасоўванні правоў чалавека на міжнародных форумах, у тым ліку праз такі механізм ААН, як Універсальны перыядычны агляд. Быў разгледжаны шэраг канкрэтных выпадкаў.
 
Дэлегацыю Еўрапейскага саюза ўзначальваў Дзірк Шубель, кіраўнік аддзела двухбаковых адносінаў з краінамі Усходняга партнёрства Еўрапейскай службы знешніх дзеянняў (EEAS). У складзе дэлегацыі былі прадстаўнікі EEAS і Еўрапейскай камісіі. Дэлегацыю Беларусі ўзначальваў намеснік міністра замежных спраў Рэспублікі Беларусь Алег Краўчанка. У яе складзе былі прадстаўнікі міністэрства замежных спраў, міністэрства юстыцыі, міністэрства ўнутраных спраў і міністэрства адукацыі. Прадстаўнікі краін Еўрапейскага саюза прысутнічалі на абмеркаваннях ў якасці назіральнікаў. Еўрапейскі саюз удзячны шэрагу арганізацый грамадзянскай супольнасці  і няўрадавых арганізацый Беларусі за актыўны ўдзел ды ўнёсак у дыскусію па грамадзянскіх, палітычных, эканамічных, сацыяльных і культурных правах на некаторых з тых сустрэч, што адбыліся ў  рамках Дыялога.

Чакаецца, што чарговая сустрэча ў рамках Дыялога па правах чалавека паміж ЕС і Беларуссю адбудзецца ў 2019 годзе.