Utanríkisráðherra boðið í hádegisverð með sendiherrum aðildarríkja ESB

Sendiherra Evrópusambandsins á Íslandi, Lucie Samcová-Hall Allen, bauð utanríkisráðherra og fylgdarliði hans á sérstakan hádegisverðarfund með sendiherrum aðildarríkja Evrópusambandsins sem haldinn var í sendiherrabústað ESB.

Meðal annars ræddu sendiherrarnir við utanríkisráðherra um hið góða samstarf milli Íslands og Evrópusambandsins, og aðildarríkja þess, og þá sérstaklega EES-samstarfið. Utanríkisráðherra fagnaði því nýja samkomulagi sem Framkvæmdastjórn ESB og EES EFTA ríkin hafa náð um fjárframlög og markaðsaðgengi fyrir sjávarafurðir. Þar að auki var 30 ára afmæli EES samningsins rætt sem á sér stað á næsta ári.

Bjarni Benediktsson tók við sem utanríkisráðherra þann 14 október 2023 eftir að hafa verið fjármálaráðherra frá árinu 2017.