Комесарката Кос во Скопје: Северна Македонија покажа дека може да испорача решително и навреме во однос на Реформската агенда, истата решителност е потребна за напредок на пристапниот пат

Комесарката се сретна со премиерот Христијан Мицкоски и со вицепремиерот и министер за европски прашања Беким Сали, на разговори за спроведувањето на Реформската агенда, за приоритетите за постепена интеграција во ЕУ, како и за пошироките случувања поврзани со патот на земјата кон ЕУ, а одржа и заедничка прес-конференција со премиерот. 

„Северна Македонија покажа дека може да испорача решително и навреме. Во Скопје, се сретнав со премиерот Христијан Мицкоски за да разговараме за големите достигнувања на земјата во рамки на Реформската агенда и за да охрабрам натамошен напредок. Истата решеност сега е потребна за напредок на пристапниот пат. Со исполнување на обврските, Северна Македонија може да гради доверба со нашите земји-членки и да му даде поттик на својот пат кон ЕУ“, напиша Кос на социјалните мрежи. 

Таа имаше средба и со претседателот на Собранието Африм Гаши во врска со важноста на конструктивниот политички дијалог и широкиот меѓупартиски консезус за ЕУ-реформите. 

Кос посети и студентски дом во Скопје реновиран со средства од ЕУ, а со претставници на младински организации разговараше за можностите што потесната интеграција во ЕУ им ги нуди на младите, вклучително и преку програмите како Хоризонт Европа и Еразмус +. 

Комесарката ја заокружи посетата со средба со претставници на граѓанското општество и медиумите, на која се разговараше за спроведувањето на клучните ЕУ-реформи, посебно во областа на владеењето на правото.