ИСПЕЧАТИ

Среќен прв роденден, Јуроп Хаус!

05.11.2020

Повеќе од 100 настани во своите простории, над 3.400 учесници и повеќе од 120 говорници – ова се дел од резултатите што Јуроп Хаус во Скопје ги оствари во првата година од отворањето. Замислена како место каде младите ќе може да се собираат, да воспоставуваат контакти и да развиваат идеи за подобра иднина за себе и за Северна Македонија, успехот на Јуроп Хаус ја поттикна Делегацијата да отвори слични центри и во други градови.

 

Музичари свират џез, сликари создаваат дела во живо, пантомимичари раскажуваат приказни без зборови... Вака излогот на Јуроп Хаус ги забавуваше минувачите и голем број следбеници на Фејсбук по повод нејзиниот прв роденден и во услови на пандемија.

На 4 ноември 2019 година, претседателот на Европскиот Парламент Давид Сасоли ја отвори Јуроп Хаус со пораката: млади луѓе, ова а место за вас да се собирате, да разменувате идеи и да се поврзувате со други, а со цел да создадете нови можности за себе и за вашата земја.

Една година подоцна, Јуроп Хаус има многу причини да биде горда на она што го постигна. Покрај многуте настани во и надвор од своите простории (како посети на средни училишта и акции за чистење ширум земјата), во кои беа вклучени стотици говорници и илјадници учесници, Јуроп Хаус организираше и онлајн дебати, преноси во живо и подкасти, како начин да продолжи со работа во услови на пандемија.

 

https://twitter.com/AmbassadorEU/status/1323947742482280448

 

Разбирливо, ковид-19 го одреди и начинот на кој се одбележа роденденот. Целодневната онлајн програма не се состоеше само од перформанси во излогот на Јуроп Хаус. Беше претставена и мобилната апликација ‘Virtual Europe House’, која е наменета за младите да организираат, да споделуваат или да учествуваат во настани од нивни интерес. Амбасадорот Дејвид Гир и неодамна избраните десет млади европски амбасадори и аташеа од Северна Македонија разговараа за предизвиците на новата генерација. Програмата заврши со онлајн ноќна забава со локален ди-џеј.

 

https://twitter.com/AmbassadorEU/status/1324010732590108674

 

Јуроп Хаус планира да го прослави својот следен роденден со повеќе простории и со уште повеќе активности и можности за младите. По огромниот број позитивни реакции за работата на Јуроп Хаус во Скопје, се планира вакви центри наскоро да се отворат и во Крива Паланка и Струмица.