2025 წლის კომუნიკაცია ევროკავშირის გაფართოების პოლიტიკასთან დაკავშირებით (ამონარიდი საქართველოს შესახებ)
კომისია კიდევ ერთხელ ადასტურებს თავის ურყევ სოლიდარობას საქართველოს მოსახლეობის მიმართ და ასევე მზადყოფნას, ევროპული მომავლისკენ მიმავალ გზაზე მისი მხარდაჭერა გააგრძელოს. საქართველოს ხელისუფლების მიერ განხორციელებული ქმედებები არ შეესაბამება ევროკავშირის მოლოდინებს ევროკავშირის კანდიდატი ქვეყნისადმი. შეინიშნებოდა სერიოზული უკუსვლა ყველა მიმართულებით ფუნდამენტურ პრინციპებთან დაკავშირებით - ეს იყო ძირითადი უფლებებისა და თავისუფლებებისთვის ძირგამომთხრელი რეპრესიული კანონმდებლობის მიღება, სასამართლო სისტემის პოლიტიკურ იარაღად გამოყენება, ოპოზიციის ლიდერების დევნა, საპროტესტო აქციებში მონაწილეების და ჟურნალისტების უსაფუძვლო დაპატიმრებები და სამოქალაქო სივრცის შევიწროვება. კონტროლისა და ბალანსის პრინციპის და დემოკრატიული გადაწყვეტილების მიღების პროცესის რღვევამ, ეფექტიანი საპარლამენტო ზედამხედველობის არარსებობასთან ერთად, გამოიწვია აღმასრულებელი ხელისუფლების გაძლიერება, მათ შორის სახელმწიფოს მიტაცება. 2024 წლის ნოემბერში საქართველოს ხელისუფლების გადაწყვეტილებამ, არ მოეხდინათ გაწევრიანების შესახებ მოლაპარაკებების ინიციირება, ცალსახად დაადასტურა მათი გადახვევა წინა მთავრობების, ცალსახად დაადასტურა მისი გადახვევა წინა მთავრობების პოლიტიკისგან, საქართველოს მოსახლეობის აბსოლუტური უმრავლესობის ევროპული მისწრაფებებისგან და საქართველოს კონსტიტუციით გათვალისწინებული ვალდებულებისგან, საქართველოს ევროკავშირში სრული ინტეგრაციის უზრუნველყოფასთან დაკავშირებით. პარალელურად, საქართველოს ხელისუფლება სისტემატურად ავრცელებდა ევროკავშირის საწინააღმდეგო რიტორიკასა და დეზინფორმაციას და არ გამოუხატავს პოლიტიკური მისწრაფება, გააგრძელოს ის რეფორმები (ანუ ცხრა ნაბიჯი), რაც კომისიის 2023 წლის 8 ნოემბრის რეკომენდაციებშია მითითებული და რომელიც აუცილებელია ქვეყნის ევროკავშირის გზაზე წინსვლისთვის. საქართველოს ხელისუფლების ქმედებებმა ძირი გამოუთხარა ევროკავშირსა და საქართველოს შორის ურთიერთობებს და საქართველო ევროკავშირის გაფართოების პროცესს ჩამოაშორა. შედეგად, საქართველოს ევროკავშირში გაწევრიანების პროცესი ფაქტობრივად ჩიხში შევიდა. იმ დრომდე, სანამ საქართველოს ხელისუფლება თავისი მოქმედების კურსს არ შეცვლის, კომისიამ, თავის მხრივ, საბჭოსთან თანამშრომლობით, მაღალი დონის პოლიტიკური კონტაქტების დონე შეამცირა, შეაჩერა ორმხრივი დახმარება, რომელსაც საქართველოს ხელისუფლებისთვის პირდაპირი სარგებელი მოჰქონდა და სამოქალაქო საზოგადოებისა და დამოუკიდებელი მედიის მხარდასაჭერად ძალისხმევა გააძლიერა. 2025 წლის დასაწყისში, კომისიის წინადადების საფუძველზე, ევროპულმა საბჭომ გადაწყვიტა ევროკავშირ-საქართველოს შორის სავიზო რეჟიმის გამარტივების ხელშეკრულების ნაწილობრივი შეჩერება და საქართველოს დიპლომატიური და სამსახურებრივი/ოფიციალური პასპორტების მფლობელებისთვის სავიზო მოთხოვნების დაწესება.
საქართველომ სასწრაფოდ უნდა შეცვალოს დემოკრატიული უკუსვლის კურსი და მიიღოს ყოვლისმომცველი და ხელშესახები ზომები საბაზისო პრობლემების გადასაჭრელად, საკვანძო რეფორმების განსახორციელებლად, - პარტიათაშორისი მხარდაჭერითა და ეფექტიანი სამოქალაქო მონაწილეობით, კანდიდატი ქვეყნისთვის დადგენილი ცხრა ნაბიჯის შესაბამისად, იმ ღირებულებებისა და პრინციპების სრული პატივისცემით, რომელზეც ევროკავშირია დაფუძნებული. ევროპული საბჭოს 2024 წლის დეკემბრის დასკვნების შემდეგ, - რამაც დაადგინა, რომ საქართველოს მთავრობის ქმედებებმა ფაქტობრივად გამოიწვია გაწევრებისწინა პროცესის შეჩერება, - საქართველო ფუნდამენტურ პრინციპებთან დაკავშირებით უკუსვლას განაგრძობს და ამის გათვალისწინებით კომისია მიიჩნევს, რომ საქართველოს ევროკავშირის წევრობის კანდიდატი ქვეყნის მხოლოდ სახელი შერჩა. საქართველოს ხელისუფლებამ უნდა გამოავლინოს მტკიცე ერთგულება კურსის შეცვლის მიმართ და ევროკავშირში გაწევრიანების გზას დაბრუნდეს.