PRINTO

BE-ja hap grup-kapitullin e fundit të negociatave të anëtarësimit me Shqipërinë mbi burimet, bujqësinë dhe kohezionin

17.11.2025
Tirana, Albania
Press and information team of the Delegation to the Albania
Cluster 5, Albania
© EU Delegation to Albania

Sot, takimi i shtatë i Konferencës së Anëtarësimit me Shqipërinë shënoi hapjen e negociatave për të ashtuquajturin grup-kapitulli 5: burimet, bujqësia dhe kohezioni. Ky grup-kapitull është i fundit që ka mbetur dhe mbulon veçanërisht: bujqësinë dhe peshkimin, sigurinë ushqimore dhe politikat e kohezionit.

“Zgjerimi është një domosdoshmëri gjeopolitike për BE-në dhe një përparësi kyçe për presidencën daneze. Anëtarësimi i partnerëve tanë të Ballkanit Perëndimor pas përfundimit të reformave të nevojshme është shumë i rëndësishëm. Hapi i sotëm i hapjes së grup-kapitullit të fundit negociues me Shqipërinë tregon angazhimin e vendit për të çuar më tej përpara rrugën e tij drejt anëtarësimit në BE”.

Marie Bjerre, Ministre e Danimarkës për Çështjet Evropiane 

Kjo hapje vjen pas hapjes së grup-kapitullit të parë mbi “Themeloret”, grup-kapitullit të gjashtë mbi “Marrëdhëniet e jashtme”, grup-kapitullit të dytë mbi “Tregun e brendshëm”, grup-kapitullit të tretë mbi “Konkurrueshmëria dhe rritja gjithëpërfshirëse” dhe grup-kapitullit të katërt mbi “Agjendën e gjelbër dhe lidhshmërinë e qëndrueshme” në Konferencat e Anëtarësimit me Shqipërinë të mbajtura përkatësisht më 15 tetor 2024, 17 dhjetor 2024, si dhe më 14 prill, 22 maj dhe 16 shtator 2025.

Monitorimi i progresit për përafrimin dhe zbatimin e acquis të BE-së dhe standardeve përkatëse evropiane do të vazhdojë gjatë gjithë negociatave.

BE-ja vendosi gjithashtu standarde për mbylljen e përkohshme të kapitujve që i përkasin grup-kapitullit 5. Konferenca e Anëtarësimit do t’i kthehet grup-kapitullit 5 në një çast të përshtatshëm.

Konteksti

Pas prezantimit të metodologjisë së rishikuar për negociatat e anëtarësimit në vitin 2020, kapitujt negociues janë ndarë në 6 grup-kapituj tematikë:

  • Themeloret
  • Tregu i brendshëm
  • Konkurrueshmëria dhe rritja gjithëpërfshirëse
  • Agjenda e gjelbër dhe lidhshmëria e qëndrueshme
  • Burimet, bujqësia dhe kohezioni
  • Marrëdhëniet e jashtme

Negociatat mbi grup-kapitullin e Themeloreve janë të parat që hapen dhe të fundit që mbyllen, dhe progresi me këtë grup-kapitull do të përcaktojë ritmin e përgjithshëm të negociatave.