PRINTO

BE-ja prezanton një projekt të ri: BE për Ekonominë Qarkulluese

26.09.2023 Press and information team of the Delegation to the Albania
EU for Circular Economy

Me synimin për të çuar përpara qëndrueshmërinë mjedisore të Shqipërisë, Bashkimi Evropian dhe Agjencia Franceze e Zhvillimit prezantuan të hënën, më 25 shtator, projektin "BE-ja për Ekonominë Qarkulluese dhe Rritjen e Gjelbër - Infrastruktura e Mbetjeve në Shqipëri". Granti i BE-së, i cili arrin në 19 milionë Euro, do të zbatohet nga AFD-ja.

Objektivi i projektit është të trajtojë pasojat e dëmshme mjedisore dhe shëndetësore që vijnë nga mbetjet e ngurta në rajonet e Kukësit dhe Gjirokastrës. Ai synon të rrisë cilësinë e jetës për 190.000 banorë në qarkun e Kukësit dhe Gjirokastrës.

Në një ceremoni të përbashkët, Ministrja e Turizmit dhe Mjedisit znj. Mirela Kumbaro, Ministri i Deleguar francez përgjegjës për Tregtinë e Jashtme, Atraktivitetin Ekonomik dhe Shtetasit Francezë Jashtë Vendit z. Olivier Becht, Ambasadorja franceze në Shqipëri znj. Catherine Suard, Ambasadori Luigi Soreca, I Ngarkuar me Punë a.i. në Delegacionin e BE-së në Shqipëri, si dhe Drejtori i AFD-së për Rajonin e Ballkanit Perëndimor z. Arnaud Dauphin, prezantuan zyrtarisht projektin e ri.

I Ngarkuari me Punë, Ambasadori Luigi Soreca, theksoi: “Mbrojtja e mjedisit është një prioritet kryesor për BE-në dhe jam shumë i lumtur të prezantoj programin e parë të ekonomisë qarkulluese të BE-së në rajon. Tani që kemi hyrë në procesin e negociatave të anëtarësimit, Shqipërisë do t'i duhet të përshpejtojë ndjeshëm të gjitha përpjekjet për zbatimin e standardeve mjedisore të BE-së dhe ky është gjithashtu një nga objektivat e këtij projekti”.

Aktivitetet e projektit përfshijnë një sërë strategjish, të tilla si intensifikimi i nismave të riciklimit për të pakësuar vëllimet e mbetjeve dhe ndërtimi i objekteve dhe landfilleve bashkëkohore të mbetjeve në përputhje me standardet e BE-së. Këto masa janë krijuar posaçërisht për të ulur nivelet e ndotjes dhe për të minimizuar emetimet e gazeve serrë. Projekti do të ndihmojë për përafrimin e Shqipërisë me standardet e BE-së, një hap kyç në rrugëtimin e saj drejt anëtarësimit në BE.

Ky projekt është pjesë përbërëse e programit më të gjerë prej 30.9 milionë Euro "BE për Ekonominë Qarkulluese dhe Rritjen e Gjelbër" për Shqipërinë.