Deklarata e Përfaqësuesit të Lartë në emër të BE-së për Ditën e të Drejtave të Njeriut, 10 Dhjetor 2021

Çdo vit, më 10 dhjetor, ne shënojmë miratimin e Deklaratës Universale të të Drejtave të Njeriut të vitit 1948. 

Tema e këtij viti: “Reduktimi i pabarazive, avancimi i të drejtave të njeriut" është veçanërisht e rëndësishme, pasi pandemia dhe pasojat e saj socio-ekonomike kanë një ndikim negativ në rritje mbi të drejtat e njeriut, demokracinë dhe shtetin e së drejtës, duke përfshirë hapësirën qytetare. Ato thellojnë më tej pabarazitë ekzistuese dhe rrisin trysninë mbi personat në situata të cenueshme, si dhe sfidojnë të drejtat e njeriut në nivel global. 

Të drejtat e njeriut, demokracia dhe shteti i së drejtës janë në qendër të reagimit të BE-së dhe rimëkëmbjes nga pandemia COVID-19. Investimi për të drejtat e njeriut, demokracinë, shtetin e së drejtës dhe mundësimi i hapësirës qytetare është thelbësor për arritjen dhe rindërtimin e shoqërive më të mira për brezat e sotëm dhe të ardhshëm. Askush nuk duhet lënë pas, asnjë e drejtë njerëzore nuk duhet shpërfillur. BE-ja kujton se çdo kufizim ndaj të drejtave të njeriut në kontekstin e pandemisë COVID-19 duhet të jetë rreptësisht i nevojshëm, proporcional, i përkohshëm në natyrë dhe jodiskriminues. 

Dita e të Drejtave të Njeriut na kujton se të drejtat e njeriut janë universale, të pandashme, të patjetërsueshme, të ndërvarura dhe të ndërlidhura. Megjithatë, ajo na kujton se këto të drejta nuk mund të merren si të mirëqena dhe se ato duhet të mbrohen vazhdimisht. BE-ja do të vazhdojë të mbështesë universalitetin e të drejtave të njeriut dhe të ushtrojë vigjilencë kundër çdo përpjekjeje për të minuar angazhimet ndërkombëtare. Në Ditën e të Drejtave të Njeriut, ne angazhohemi të dyfishojmë përpjekjet tona për t’i përkrahur dhe për të ngritur zërin për të shtypurit dhe ata që janë të kërcënuar, kudo që të jetojnë. Solidariteti dhe mbështetja jonë shkon në veçanti për aktorët e shoqërisë civile dhe mbrojtësit e të drejtave të njeriut, duke përfshirë ata me të cilët u angazhuam në Forumin e OJQ-ve të BE-së për të Drejtat e Njeriut, më 7-8 dhjetor. 

Gjatë gjithë vitit 2021, sipas Planit të Veprimit për të Drejtat e Njeriut dhe Demokracinë 2020-2024, BE-ja ka vazhduar të përforcojë veprimet globale për të mbrojtur dhe rigjallëruar të drejtat e njeriut në mbarë botën, duke përdorur plotësisht gamën tonë unike të instrumenteve. Për herë të parë, BE-ja ka vendosur sanksione ndaj personave dhe subjekteve nga Kina, RPDK-ja, Libia, Sudani i Jugut, Eritrea dhe Rusia, të përfshirë në shkelje dhe abuzime serioze me të drejtat e njeriut, në kuadër të Regjimit Global të Sanksioneve të BE-së për të Drejtat e Njeriut të miratuar vitin e kaluar. Për më tepër, në vitin 2021, BE-ja mori drejtimin në forumet e Bashkuara Kombëtare për të Drejtat e Njeriut për nisma që synojnë trajtimin e shkeljeve të të drejtave të njeriut në Afganistan, Bjellorusi, Burundi, RPDK, Etiopi, Eritre dhe Mianmar. 

BE-ja zgjeroi gjithashtu më tej mbështetjen konkrete për organizatat e shoqërisë civile dhe mbrojtësit e të drejtave të njeriut për të çuar përpara të drejtat e njeriut dhe demokracinë në mbarë botën përmes një programi tematik specifik, me vlerë mbi 1.5 miliardë euro për periudhën 2021-2027, duke riafirmuar rolin e vet si lider botëror në këtë fushë. 

Arritja e të drejtave të njeriut nuk është vetëm një domosdoshmëri për dinjitetin njerëzor, por edhe një gur themeli i demokracisë, paqes dhe sigurisë, si dhe i zhvillimit të qëndrueshëm.